Ալիևն ու Էրդողանը խոստացել են օգնել Զելենսկիին

Այսօր Ուկրաինայի նախագահ Վլադիմիր Զելենսկին զանգահարել է Ադրբեջանի նախագահ Իլհամ Ալիևին։ Այս մասին ասված է երկրի ղեկավարի թվիթերում արած գրառման մեջ։

Ուկրաինայի նախագահն իր երախտագիտությունն է հայտնել Իլհամ Ալիևին՝ նրա օգնության և ջանքերի համար․

«Զելենսկին շնորհակալություն է հայտնել Իլհամ Ալիևին հրադադարի հասնելու, հակամարտությունը քաղաքական հարթություն տեղափոխելու ուղղությամբ գործադրած ջանքերի և ուկրաինացի ժողովրդին դեղեր ու բժշկական սարքավորումներ հասցնելու համար»,- ասված է հաղորդագրության մեջ։

Զելենսկին հայտարարել է նաև , որ Ալիևը խոստացել է Ուկրաինային օգնել նավթամթերքով։

Ուկրաինայի նախագահը զրուցել է նաև Թուրքիայի նախագահ Ռեջեփ Թայիփ Էրդողանի հետ, որի ժամանակ քննարկել են Ուկրաինայում տեղի ունեցող իրադարձությունները:

«Հեռախոսազրույցի ընթացքում քննարկվել են Ուկրաինայում տեղի ունեցող վերջին զարգացումները»,- լրագրողներին հայտնել են Թուրքիայի նախագահի գրասենյակից։

Էրդողանը հայտարարել է, որ ջանքեր է գործադրում Ուկրաինայում, որքան հնարավոր է շուտ, զինադադար հաստատելու ուղղությամբ, ինչի արդյունքում այլևս չեն լինի մարդկային զոհեր։

Զելենսկին իր ուղերձում հայտնել է, որ Ադրբեջանի նախագահ Իլհամ Ալիևն ու Թուրքիայի առաջնորդ Թայիփ Էրդողանն առաջարկել են կազմակերպել բանակցություններ Ռուսաստանի հետ։