ԱԱԾ պահեստազորի սպաների միությունը դատապարտում է Իրանի դեմ հարձակումը

ԱԱԾ պահեստազորի սպաների միությունը հայտարարություն է տարածել, որը ներկայացնում ենք ստորև․

Ս/թ հունվարի 28-ից ԱԹՍ-ների կիրառմամբ հարվածներ են հասցվել Իրանի Իսլամական Հանրապետության տարբեր քաղաքներում տեղակայված օբյեկտներին: Սա փաստացի հարձակում է սուվերեն պետության վրա, ընդ որում առանց որևէ հստակ ընկալելի հիմնավորվածության:

Տարակուսելի է, որ Հայաստանի իշխանություններն առ այսօր մեր դրացի երկրի նկատմամբ իրականացված ագրեսիային պաշտոնապես չեն արձագանքել, դատապարտող հայտարարությամբ հանդես չեն եկել: Ընդ որում սա այն պարագայում, որ Իրանը Հայաստանի նկատմամբ մշտապես դրսևորել է առնվազն բալանսավորված դիրքորոշում, իսկ վերջին շրջանում հենց նրա շնորհիվ է զսպվել ադրբեջանաթուրքական տանդեմի նկրտումները մասնավորապես Սյունիքի նկատմամբ:

Ընդհանրապես թե մարդկային, թե միջպետական հարաբերություններում չպետք է լինել ապերախտ, հարկ է պաշտպանել սեփական, ինչպես նաև բարեկամ երկրների շահերը, այլապես զրոյանալու են հեղինակությունդ, վարկդ, վերածվելու ես վասալի: