Լրահոս

Ռուսաստանը ողջունում է Թուրքիայի և Հայաստանի միջև հարաբերությունների կարգավորման ընթացքը, Թուրքիայի ԱԳ նախարար Մևլյութ Չավուշօղլուի հետ համատեղ ասուլիսի ժամանակ հայտարարել է ՌԴ արտաքին գործերի նախարար Սերգեյ Լավրովը։ «Կազմակերպվել է Հայաստանի և Թուրքիայի հատուկ ներկայացուցիչների հանդիպումները: Մենք ողջունում են Հայաստանի և Թուրքիայի միջև երկկողմ կապերի կարգավորման գործընթացը և մեր կողմից պատրաստ ենք համատեղ աշխատանքի, որը թույլ կտա խորացնել համագործակցությունը Հարավային Կովկասի երկրների միջև»,- ասել է Լավրովը: ՌԴ արտգործնախարարը նշել է, որ Թուրքիայի արտգործնախարարի հետ քննարկել են Սիրիայի, Լիբիայի և Լեռնային Ղարաբաղի հարցերը: facebook sharing buttonmessenger sharing buttontwitter sharing buttontelegram sharing buttonskype sharing buttonpinterest sharing buttonsharethis sharing button

Հանրապետության նախագահ Վահագն Խաչատուրյանն այսօր ընդունել է Արցախի Հանրապետության Ազգային ժողովի գիտության, կրթության, մշակույթի, երիտասարդության և սպորտի հարցերի մշտական հանձնաժողովի անդամներին: Նախագահ Խաչատուրյանը նշել է, որ նման այցերն ու ակտիվ շփումներն այս օրերին հատկապես կարևոր են: ՀՀ Ազգային ժողովի գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի հետ համատեղ ընդլայնված նիստին մասնակցելու նպատակով Հայաստան ժամանած պատվիրակության անդամները նախագահին են ներկայացրել հանձնաժողովի կողմից իրականացվող ծրագրերն ու առաջիկա անելիքները: Առանձնահատուկ կարևորվել է Ադրբեջանի վերահսկողության տակ գտնվող տարածքներում հայկական պատմական, հոգևոր և մշակութային ժառանգության պահպանման հարցը և միջազգային հարթակներում խնդրի բարձրաձայնումը: Անդրադարձ է եղել նաև կրթության, գիտության և մշակույթի ոլորտներում Հայաստանի և Արցախի միջև համագործակցության խորացմանը: Այդ համատեքստում մասնավորապես կարևորվել է տեղեկատվական տեխնոլոգիաների ոլորտում համատեղ կրթական ծրագրերի իրականացման հեռանկարը: Նախագահ Վահագն Խաչատուրյանն ընդգծել է որակյալ կրթության անհրաժեշտությունը: Հանդիպմանն անդրադարձ է կատարվել նաև Արցախի և արցախահայության ներկայիս խնդիրներին ու առկա մարտահրավերներին, որոնց լուծման ճանապարհին նախագահ Խաչատուրյանը հատկապես կարևորել է մեր ժողովրդի միասնականությունը և համախմբվածությունը:

Քաղաքագետ Ստեփան Դանիելյանը գրում է․ «Ադրբեջանցիների դիրքերի առաջ գալն ու ՊՆ-ի հայտարարության իմաստը չհասկացողներին պարզ բացատրեմ, կատարվում է սահմանազատման ու սահմանագծման գործընթացը, որի մասին կառավարությունը վախենում է պարզ հայտարարել, սակայն ծածուկ կերպով կատարում է: Մի քանի գյուղերի զիջման ժամանակ նույնպես չզարմանաք, թե ինչ է կատարվում»:

Արցախի Ասկերանի շրջանի Խրամորթ գյուղին մոտակա դիրքերում ադրբեջանցի զինվորականները կրկին մուղամը էին միացրել, հայերենով կոչ էին արել բնակչությանը հեռանալ։ Այս մասին 24News-ին ասաց Արցախի Հանրապետության Ազգային ժողովի «Արդարություն» խմբակցության պատգամավոր Մետաքսե Հակոբյանը։ «Ադրբեջանցիներն անընդհատ, օրը 4-5 անգամ միացնում են։ Մի հուսադրող բան կա, Խրամորթի տղամարդիկ ավելացել են, այն խրամորթցիները, որոնք գյուղում չէին բնակվում երկար տարիներ, վերադարձել են։ Համայնքապետն ասում էր, որ մարդ կար, 10 տարի չէր ապրում, հիմա եկել ու կանգնել է գյուղացիների կողքին, այնտեղից են նաև մեր զինվորները, այնտեղ են նաև ռուս խաղաղապահները, այդ առումով հանգիստ ենք», - եզրափակեց պատգամավորը։ Արցախում ադրբեջանական զինուժի մարտական դիրքերին սահմանակից հողերում գյուղացիները չեն կարողանում գյուղատնտեսական աշխատանքներ իրականացնել, քանի որ ադրբեջանցիները հաճախակի սադրիչ գործողությունների են դիմում՝ կրակում են նրանց ուղղությամբ, բարձրախոսներով կոչ են անում հեռանալ բնակավայրերից։

Աժ-ի ընդդիմադիր «Հայաստան» խմբակցության պատգամավորներն այսօր Էդուրադ Աղաջանյանին հիշեցրել են, որ Արցախի ինքնորոշման իրավունքի կարմիր գիծը դեռ 30 տարի է գծվել, երբ Հայաստանի Գերագույն Խորհուրդը որոշել է, որ անընդունելի է ցանկացած փաստաթուղթ, որտեղ Լեռնային Ղարաբաղի Հանրապետությունը նշված կլինի Ադրբեջանի կազմում:

«Կապանի Ներքին Հանդ գյուղի մասին պաշտպանության նախարարության հայտարարությամբ՝ մեր սուվերեն տարածքը զիջվում է Ադրբեջանին»: ՊՆ երեկվա հաղորդագրությունն այսպես դատապարտել է Հայաստանի նախկին օմբուդսմենը:

#Քաղաքական 16 03 2022 Ադրբեջանը պահանջում է, որ Արցախը մնա Ադրբեջանի կազմում, մեր իշխանությունները լռում են. Սեյրան Օհանյան․ «Փաստինֆո» Ադրբեջանը պահանջում է, որ Արցախը մնա Ադրբեջանի կազմում, մեր իշխանությունները լռում են. Սեյրան Օհանյան․ «Փաստինֆո» «Փաստինֆո»-ն գրում է․ Արցախում անվտանգային և հումանիտար առումով աղետալի վիճակ է, իսկ Հայաստանի իշխանությունները ձեռքերը լվացել են Արցախից: «Փաստինֆո»-ի հետ զրույցում հայտարարել է «Հայաստան» խմբակցության ղեկավար, ՊՆ նախկին նախարար Սեյրան Օհանյանը՝ գնահատելով Արցախում ստեղծված իրավիճակը: Ըստ ՊՆ նախկին նախարարի՝ թշնամու նպատակն է զբաղեցնել իր համար կարևոր բարձունքները և ճանապարհները, ռազմավարական կետերը, որպեսզի տարածքային առավելություն ստանա և հետագայում ճնշումներ գործադրի Հայաստանի և Արցախի վրա. «Իսկ ռազմավարական առումով նրանց նպատակը Արցախը հայաթափելն է, սրա մասին են խոսում մի քանի փաստաթղթեր, որոնց Հայաստանի իշխանությունը լուրջ չի վերաբերվում, խոսքն, օրինակ, «Շուշիի հռչակագրի» մասին է, որը նախապայման է հայ-թուրքական հարաբերությունների: Այնտեղ խոսվում է նաև Ադրբեջանի 5 նախապայմանների մասին, որոնք վերաբերվում են տարածքային ամբողջականության ճանաչմանը, խաղաղության հաստատմանը, ըստ էության, կարելի է ասել, որ սրանով Արցախի մնում է Ադրբեջանի կազմում, իսկ Հայաստանի իշխանությունները որևէ կերպ չեն արձագանքում սրան»,-ասաց Օհանյանը: Ադրբեջանական ամենօրյա ագրեսիայի ֆոնին՝ Հայաստանի իշխանությունները արձագանքելու փոխարեն միակողմանի խաղաղության կոչեր են հնչեցնում, ավելին՝ ՀՀ ԱԳՆ հայտարարություն է տարածել, որ Հայաստանը Ադրբեջանի հետ խաղաղության պայմանագրի կնքման նպատակով բանակցություններ կազմակերպելու համար դիմել է ԵԱՀԿ ՄԽ համանախագահությանը։ Սեյրան Օհանյանից հետաքրքրվեցինք՝ ինչի՞ կարող է հանգեցնել միակողմանի խաղաղության կոչերը և արդյո՞ք Ադրբեջանի հետ խաղաղության պայմանագրի կնքումը երաշխիք է, որ այլևս կդադարեցնի իր սադրանքները, ագրեսիան հարցին ի պատասխան՝ ՊՆ նախկին նախարարը պնդեց, որ որևէ երաշխիք չկա, որ Ադրբեջանը խաղաղության պայմանագիր կնքելուց հետո այլևս սադրանքների չի դիմի. «Նորմալ պետությունները խաղաղություն չեն մուրում, խաղաղություն պարտադրում են, մենք կողմ ենք խաղաղությանը, բայց դեմ ենք միակողմանի պարտադրանքին, այն նախապայմանները, որոնք թուրք-ադրբեջանական տանդեմը դնում է Հայաստանի առջև, դա պարտադրանք է մեզ՝ գնալ միակողմանի խաղաղության, սա անընդունելի է, իսկ խաղաղության պայմանագրի ստորագրումը երաշխիք չէ, որ Ադրբեջանն այլևս չի գնա սադրանքների»,-ասաց Օհանյանը: Նրա արձանագրմամբ՝ Հայաստանն այլևս ձեռքերը լվացել է Արցախից և չի զբաղվում Արցախի խնդրով, ըստ նրա ՝ Հայաստանի իշխանությունները որևէ քայլ չեն ձեռնարկում Արցախի ժողովրդի անվտանգությունն ապահովելու համար. «Ես բազմիցս ասել եմ, որ Հայաստանի իշխանությունները չեն կարողանում որոշել այն առաջնահերթությունները, որոնք գերակա են այսօր մեր ժողովրդի համար՝ դա Հայաստանի և Արցախի անվտանգությունն է, մեր սահմաններն են, բանակի մարտունակության արագ վերականգնումն է, սրա փոխարեն նրանք զբաղված են նեղ իշխանական շահեր սպասարկմամբ»,-ասաց նա: Զրույցի վերջում Սեյրան Օհանյանից նաև հետաքրքրվեցինք՝ հաշվի առնելով հակառակորդի ակտիվացումը, արդյո՞ք առաջիկայում Արցախում ռազմական գործողությունների վտանգ տեսնում է, թե ոչ. «Արցախում նոր դիրքերը կահավորելու ուղղությամբ ավելի արագ են աշխատում, Արցախի իշխանությունը և բանակը պետք է իր ներուժը նետի սահման ուսումնասիրի և հայտնաբերի բոլոր այն բացերը որտեղ Ադրբեջանը կարող է սադրանքների գնալ, ներխուժել Արցախի տարածք»,-պատասխանեց ՊՆ նախկին նախարարը:

Մարտի 15-ին ՀՀ պաշտպանության նախարար Սուրեն Պապիկյանն ընդունել է Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Աբբաս Բադախշան Զոհուրիին: Հանդիպմանը մասնակցել է նաև ՀՀ-ում ԻԻՀ դեսպանության ռազմական կցորդ, գնդապետ Բահման Սադեղինը: Կողմերն անդրադարձել են հայ-իրանական երկկողմ համագործակցության հեռանկարներին, քննարկել տարածաշրջանային և միջազգային անվտանգությանն առնչվող մի շարք հարցեր: ՀՀ պաշտպանության նախարարը ներկայացրել է նաև իրադրությունը հայ-ադրբեջանական սահմանագոտում և Արցախում:

ՀՀ քննչական կոմիտեի Կոտայքի մարզային քննչական վարչությունում իրականացվում են քննչական և դատավարական այլ անհրաժեշտ գործողություններ՝ հանրային սննդի օբյեկտում զենքի գործադրմամբ խուլիգանություն կատարելու դեպքը բացահայտելու ուղղությամբ: Նախնական տվյալներով՝ 2022 թվականի մարտի 15-ին՝ ժամը 18:00-ի սահմաններում, Երևան-Սևան ավտոճանապարհի 39-րդ կմ հատվածում գտնվող հանրային սննդի օբյեկտում անհայտ անձը, անտեսելով հասարակական վայրում վարքագծի և մարդկային համակեցության կանոնները, դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով հասարակության նկատմամբ, իր մոտ գտնվող հրազենով կրակել է Քաղսի բնակավայրի 36-ամյա բնակչի ուղղությամբ՝ պատճառելով մարմնական վնասվածքներ: Դեպքի առթիվ հարուցվել է քրեական գործ՝ ՀՀ քրեական օրենսգրքի 258-րդ հոդվածի 4-րդ մասի հատկանիշներով: Հիշյալ 36-ամյա տղամարդը ճանաչվել է տուժող: Նախաքննության ընթացքում կատարված դեպքի վայրի զննությամբ հայտնաբերվել են որսորդական հրացանի մեկ չկրակված փամփուշտ և մեկ կրակված պարկուճ, ինչպես նաև՝ արնանման հետքեր, վերցվել են փորձանմուշներ, առգրավվել են տուժողի հագին դեպքի պահին եղած հագուստները և սննդի օբյեկտում տեղակայված անվտանգության տեսախցիկների տեսագրությունները, հարցաքննվել են մի շարք անձինք: Քրեական գործով էական նշանակություն ունեցող հանգամանքներ պարզելու նպատակով նշանակվել են դատաբժշկական, ինչպես նաև՝ դատաձգաբանական և դատահետքաբանական համալիր փորձաքննություններ: Նախաքննությունը շարունակվում է: Ձեռնարկվում են միջոցառումներ՝ առերևույթ հանցագործություն կատարած անձի ինքնությունը պարզելու, նրան հայտնաբերելու և վարույթն իրականացնող մարմնին ներկայացնելու, հանցագործության գործիք հանդիսացող հրացանը հայտնաբերելու, ցուցմունքներում մատնանշված հանգամանքները ստուգելու ուղղությամբ: Հանձնարարություններ են տրվել հետաքննության մարմնին:

Մարտի 8-ից ի վեր ՀՀ կառավարության ու ռուս խաղաղապահների աջակցությամբ իրականացվող բանակցությունների շնորհիվ՝ ադրբեջանական կողմն այսօր սկսել է վնասված գազատար խողովակի վերանորոգման աշխատանքները: Ուստի, պայմանավորվածության համաձայն՝ գազամատակարարումը կարճ ժամկետում կվերականգնվի, և Արցախի իշխանությունները գործադրում են բոլոր ջանքերը, որ դա տեղի ունենա ժամ առաջ: ❗️Միևնույն ժամանակ, հորդորում ենք բոլոր բաժանորդներին պահպանել զգոնություն և համոզվել, որ գազամատակարարման վերականգնման պահին գազի արտահոսք ու արտակարգ ՊԱՏԱՀԱՐ տեղի չունենա: Արցախի կառավարությունը հայցում է բոլոր քաղաքացիների ներողամտությունը հարուցված դժվարությունների համար և հավաստիացնում, որ Արցախի առջև ծառացած բոլոր հիմնախնդիրները կարող ենք հաղթահարել մեր միասնականության, վճռականության ու համբերության միջոցով:

Այժմ քննարկվում է Ուկրաինայի ապառազմականացված պետության ավստրիական կամ շվեդական տարբերակը, դա կարող է դիտվել որպես փոխզիջում: Այս մասին չորեքշաբթի լրագրողներին հայտնել է ՌԴ նախագահի մամուլի քարտուղար Դմիտրի Պեսկովը, փոխանցում է ТАСС-ը։ Ավելի վաղ ՌԴ նախագահի օգնական Վլադիմիր Մեդինսկին հայտարարել էր, որ Կիևն առաջարկում է Ուկրաինայում ապառազմականացված պետության ավստրիական կամ շվեդական տարբերակ ստեղծել։ Այս առնչությամբ լրագրողները հետաքրքրվեցին, թե արդյոք Կրեմլը բավարարվա՞ծ է ապառազմականացման այս տարբերակով։ «Այդ տարբերակը, որն իսկապես այժմ քննարկվում է, կարող է դիտվել որպես որոշակի փոխզիջում»,- պատասխանել է Պեսկովը։ Նա համոզմունք է հայտնել, որ Ուկրաինայի շուրջ իրավիճակը կարող է բարելավվել Մոսկվայի և Կիևի միջև բանակցություններում պայմանավորվածությունների օգնությամբ։ Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»: ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։ Գերագույն Ռադան Ուկրաինայում ռազմական դրություն է մտցրել։

Սյունիքում անցած շաբաթ ևս մեկ կիլոմետր առաջ եկած ու Վերին Հանդ գյուղում վրաններ խփած ադրբեջանցիների նպատակը ռազմավարական նշանակության մեկ հանգույց գրավելն է: Այսպիսի կարծիք Ազգային ժողովի «Պատիվ ունեմ» խմբակցության պատգամավոր Տիգրան Աբրահամյանն է հայտնել 5-րդ ալիքի «Օրագիր» հաղորդման տաղավարում:

Մարտի 16-ին, ժամը 12։35-ին Կոտայքի մարզային ճգնաժամային կառավարման կենտրոն ահազանգ է ստացվել, որ հրդեհ է բռնկվել Չարենցավան քաղաքի կարի ֆաբրիկայի պահեստում, հայտնում են ԱԻՆ-ից: Հրդեհի բարդության «Թիվ 2» կանչով դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատներից չորս մարտական հաշվարկ։ Ըստ նախնական տվյալների՝ հրդեհը բռնկվել է հումքի պահեստի տարածքում (մոտ 30 քմ):

44-օրյա պատերազմում զոհվել է նաև աստղաֆիզիկոս Վիկտոր Համբարձումյանի եղբոր թոռը՝ Ռուբենը։ Ամրակազմ, թիկնեղ տղան, որ շատ էր սիրում թվերի ու աստղերի աշխարհը, նաև քաղցրավենիք, ծնվել է Երևանում։ Դեռ փոքր տարիքից պարզ երևում էին Ռուբենի բացառիկ ունակությունները։ «Ռուբենս սովորել է Արտաշես Շահինյանի անվան ֆիզմաթ դպրոցում։ Բացառիկ խելքի տեր էր։ Ինչից հարցնեիր, գիտեր, սիրելի թեմաներն էլ կապված էին թվերի հետ։ Շատ հանգիստ երեխա էր, քչախոս ու քչով էլ բավարարվող։ Երբեք ոչ մի նեղություն տված չկա՝ ոչ փոքր տարիքում, ոչ ծառայության ընթացքում»,- պատմում է մայրը՝ Աննան։ Կանաչ աչքերով Ռուբենը սիրահարված էր, չէ, աղջկա չէ, աստղերին։ Մայրն ասում է՝ ռոմանտիկ չէր, բայց հաճախ էր երկնքին նայում։ Կրտսեր Համբարձումյանն ընդունվել էր ԵՊՀ կիրառական մաթեմատիկայի և ինֆորմատիկայի ֆակուլտետ, նաև Մոսկվայի ֆիզիկատեխնիկական համալսարան։ Որոշել էր՝ մինչև չծառայի, չի մեկնի Մոսկվա։ «2019թ․ հուլիսի 26-ին էր զորակոչվել բանակ Ռուբենս։ Նա դարձել էր ավագ հետախույզ, ապա՝ հրետանավոր։ Ծառայության 6-րդ ամսում սերժանտական դասընթացների էր մասնակցել։ Լավ ծառայության համար սեպտեմբերի 12-ին տղաս ստացել էր սերժանտի կոչում և պարգևատրվել «Քաջարի մարտիկ» կրծքանշանով։ Մաթեմատիկայի և հաշվարկային գերազանց հմտությունների շնորհիվ՝ դարձել էր N հրետանային դիվիզիոնի կառավարման դասակի շտաբի պետի հաշվարկող»,- պատմում է Աննա մայրիկը։ Նա ոչ թե զենք պիտի բռներ, այլ պիտի սարքեր, որ Հայաստանը հաղթանակներ ունենար։ Ռուբենը ոչ հասցրեց զենք սարքել, ոչ էլ տեսավ իր այնքան սիրելի երկրի հաղթանակները։ Ծառայելիս է եղել Մարտունիում։ Համբարձումյանների ընտանիքին անծանոթ շատ մարդիկ են նրանց ասել՝ եթե Ռուբենի ճշգրիտ հաշվարկները չլինեին, Մարտունու զորամասը հօդս ցնդած կլիներ։ «Պատերազմի ընթացքում Ռուբենի հաշվարկած թիրախների կորդինատներով, բացարձակ ճշգրտությամբ, ոչնչացվել է թշնամու ահռելի թվով զրահատեխնիկա։ Նա մասնակցել է Մարտունու թեժ մարտերին։ Հոկտեմբերի 2-ին վիրավորվել է տղաս՝ ստանալով կանտուզիա, և մի քանի օր բուժվելուց հետո՝ դեռ չապաքինված, նորից անցել է ծառայության։ Ռուբենս զոհվել է Մարտիունիում՝ հոկտեմբերի 22-ին»։ Ուսուցիչները պատմում են, որ Ռուբենը միշտ հպարտանում էր իր ազգանունով, իրենք էլ տղայի՝ Վիկտոր Համբարձումյանի եղբոր թոռը լինելով։ Քաղցրակեր Ռուբենը քաղցրացնում էր ընտանիքի կյանքը, որ հիմա, տիկին Աննայի խոսքերով, անգույն ու անհամ է դարձել։ «Այն երկնքին, որին սիրահարված էր Ռուբենս, հիմա դժվարությամբ եմ նայում։ Հոգիս դատարկված է, բայց փայլուն աստղերը մի բան հուշում են՝ որդիս կա»։

Ադրբեջանական կրակոցների հետևանքով Խրամորթից այլ բնակավայրեր տեղափոխված կանայք և երեխաները դեռևս չեն վերադարձել Խրամորթ: Ասկերանի շրջվարչակազմը հայտարարել է, որ այլ բնակավայրերի բնակիչների անվտանգությանը ոչինչ չի սպառնում:

Մարտի 16-ի ժամը 11:00-ի դրությամբ՝ Արցախում կորոնավիրուսի 3 նոր դեպք է հաստատվել: Արցախի առողջապահության նախարարությունից NEWS.am-ին հայտնում են, որ կատարվել է 57 թեստավորում։ Ստացիոնար բուժում է ստանում 18 քաղաքացի։ Այսպիսով, 2022 թվականին կատարվել է 10263 թեստավորում, հաստատվել է կորոնավիրուսային հիվանդության ընդհանուր 3067 դեպք: Ընդհանուր առմամբ, կորոնավիրուսի հետևանքով մահվան 40 դեպք է արձանագրվել:

Մայրաքաղաքում այսօր ցերեկը, մարտի 17-ին սպասվում է առանց տեղումների եղանակ: Մարտի 18-21-ը ժամանակ առ ժամանակ սպասվում է ձյուն: Մարզերում այսօր ցերեկը, մարտի 17-ի երեկոյան, 18-ի գիշերը, 21-ի ցերեկն առանձին շրջաններում, մարտի 18-ի ցերեկը, 19-ին, 20-ին, 21-ի գիշերը ժամանակ առ ժամանակ շրջանների զգալի մասում սպասվում է ձյուն: Լեռնային առանձին շրջաններում սպասվում է բուք, ցածր հորիզոնական տեսանելիություն։ Քամին՝ հյուսիս-արևմտյան 3-7 մ/վ, մարտի 18-21-ն առանձին շրջաններում սպասվում է քամու ուժգնացում 14-18 մ/վ արագությամբ: Օդի ջերմաստիճանը մարտի 17-ի գիշերն աստիճանաբար կնվազի 5-8 աստիճանով: Արցախում այսօր սպասվում է ձյուն, վաղը՝ առանց տեղումների եղանակ։

ՀՀ քննչական կոմիտեի հատուկ հանձնարարությունների կազմակերպական-վերլուծական և քրեագիտական գլխավոր վարչությունում քննվող քրեական գործով իրականացվում են քննչական և դատավարական այլ մեծածավալ գործողություններ՝ «Ֆինիկո» ընկերության հանցավոր գործունեության արդյունքում տուժած բոլոր անձանց հայտնաբերելու ուղղությամբ: ՀՀ ՊԵԿ հետաքննության և օպերատիվ-հետախուզության վարչության աշխատակիցների կողմից իրականացված օպերատիվ-հետախուզական միջոցառումների արդյունքում տվյալներ են ձեռք բերվել այն մասին, որ 2020թ. մարտից Հայաստանի Հանրապետությունում գործունեություն է իրականացրել «Ֆինիկո» («FINIKO») անվանումով ընկերություն, որը գործել է որպես ֆինանսական ներդրումային գործունեություն իրականացնող ընկերություն և հաճախորդներին առաջարկել է ներդրումներ կատարել՝ հետագայում 25-30 տոկոս եկամտաբերություն ստանալու նպատակով: Ներդրումները կատարվել են կանխիկ գումարները կրիպտոարժույթի փոխարկելու և դրանք ընկերության համապատասխան էլեկտրոնային դրամապանակ մուտքագրելու եղանակով: Ձեռնարկված միջոցառումների արդյունքում պարզվել է, որ ստեղծվել և ղեկավարվել է ֆինանսական բուրգ, այսինքն՝ իրականացվել է գույքի ներգրավմանն ուղղված գործունեություն, որով գույք ներդրողի օգուտը պայմանավորվել է նոր ներդրողների ներգրավումից ստացված գույքի հաշվին՝ առանց նշված գույքն իրական ձեռնարկատիրական գործունեության մեջ օգտագործելու մտադրության, որի արդյունքում անձանց պատճառվել է խոշոր չափի վնաս: Պարզվել է նաև, որ ՀՀ տարածքում «Ֆինիկո» անվանումով ընկերության գործունեությունը ղեկավարվել է Վազգեն Զոբոյանի և վերջինիս կնոջ կողմից, ովքեր 2021թ. հուլիսի 31-ից Հայաստանի Հանրապետությունում չեն գտնվում: Վարույթն իրականացնող մարմինը հորդորում է, որ նշված ընկերության հանցավոր գործունեությունից տուժած քաղաքացիները դիմեն Քննչական կոմիտեի հատուկ հանձնարարությունների կազմակերպական-վերլուծական և քրեագիտական գլխավոր վարչություն: