Լրահոս

Փաստ է, որ հակաբիոտիկները ազդում են ստամոքս-աղիքային տրակտի վրա, սակայն քչերը գիտեն, թե ինչպես կարելի է նվազագույնի հասցնել դրանց բացասական ազդեցությունը: Հակաբիոտիկները բնական կամ արհեստականորեն սինթեզված նյութեր են, որոնք կարող են ազդել բակտերիաների աճի և զարգացման վրա: Հակաբիոտիկների ընդունումը անհրաժեշտ միջոց է որոշ լուրջ հիվանդությունների առկայության դեպքում, որոնք սպառնում են մարդու առողջությանը։ Ցավոք, հակաբիոտիկների ազդեցության տակ մահանում են ոչ միայն պաթոգեն բակտերիաները, այլև օրգանիզմի օգտակար միկրոֆլորան, հակաբիոտիկ թերապիայի կուրսից հետո միկրոֆլորայի վերականգնումը պարտադիր է։ Ամենից հաճախ հակաբիոտիկները նշանակվում են՝ թոքաբորբի, տուբերկուլյոզի, արյան թունավորումների, ստամոքս-աղիքային սուր վարակների, հետվիրահատական ​​բարդությունների, սեռավարակների դեպքում։ Հակաբիոտիկների ընդունման բացասական հետևանքները բազմազան են և ազդում են բազմաթիվ օրգանների և համակարգերի վրա: Նկատվում են նյարդային համակարգի, բջջային շնչառության համակարգի խանգարումներ և ալերգիկ ռեակցիաներ։ Այնուամենայնիվ, առավել ցայտուն բացասական ազդեցությունը տեղի է ունենում ստամոքս-աղիքային տրակտի հետ կապված խնդիրների պարագայում։ Աղիքային միկրոֆլորայի խախտում. Սինթետիկ լայն սպեկտրի հակաբիոտիկները ուղղված են զանգվածային ոչնչացմանը, ներառյալ այն միկրոօրգանիզմները, որոնք անհրաժեշտ են մարդու նորմալ կյանքի համար: Քանի որ օգտակար միկրոֆլորան կարող է վերականգնվել բավականին երկար ժամանակ, նոր պաթոգեն բակտերիաները և սնկերը կարող են իրենց տեղը գրավել աղիքներում, ինչը հանգեցնում է անձեռնմխելիության նվազմանը և մեծացնում քրոնիկ հիվանդությունների զարգացման ռիսկը։ Մարսողական համակարգի խանգարումներ. Հակաբիոտիկների ընդունումը բացասաբար է անդրադառնում օրգանիզմի մարսողական համակարգի վիճակի վրա, օգտակար բակտերիաների կողմից արտադրվող ֆերմենտների պակասը զգալիորեն նվազեցնում է մարսման բնականոն ընթացքը: Սա հանգեցնում է ստամոքսի լորձաթաղանթի գրգռման, ինչպես նաև խաթարում է ներքին սեկրեցիայի աշխատանքը։ Հակաբիոտիկների ազդեցության տակ փոխված միկրոֆլորան չի կարող կատարել իր կենսական գործառույթները՝ մարսողական, սինթետիկ և այլն: Այս գործառույթների խախտման հետևանքները ազդում են ամբողջ մարմնի վրա: Դիսբիոզով պայմանավորված պայմանները ներառում են՝ շաքարային դիաբետ, գիրություն, բրոնխիալ ասթմա։ Եթե ​​միկրոֆլորայի հավասարակշռությունը խախտվում է, ապա մեծանում է նաև մի շարք վարակիչ հիվանդությունների զարգացման ռիսկը։ Հիվանդների մոտ առկա ախտանշաններն են՝ գրգռված աղիք, սրտխառնոց, փսխում, որովայնի ցավ, փորլուծություն: Հենց վերջինն էլ հանդիսանում է հակաբիոտիկների ընդունման բացասական հետևանքներից ամենատարածվածը։ Կանխարգելիչ միջոցառումներ հակաբիոտիկների կուրսից հետո. Հակաբիոտիկների ընդունման բացասական հետևանքները նվազագույնի հասցնելու համար պետք է հետևել մի շարք կանոնների, որոնք հանդիսանում են առողջությանը վնաս պատճառելու կանխարգելում։ Պետք է ընդունել հակաբիոտիկներ միայն համապատասխան բժշկի կողմից սահմանված կարգով: Հակաբիոտիկների ընդունման նպատակահարմարության մասին որոշումը պետք է կայացնի միայն բժիշկը։ Մասնագետն է, ով կընտրի անհրաժեշտ դեղը, թողարկման ձևը, դեղաչափը և կսահմանի ընդունման տևողությունը։ Հակաբիոտիկների օգտագործումն արդարացված է միայն բակտերիալ վարակների հետևանքով առաջացած հիվանդությունների դեպքում։ Վիրուսային հիվանդությունների համար հակաբակտերիալ դեղամիջոցների օգտագործումը տեղին չէ: Անհրաժեշտ է խստորեն հետևել դեղամիջոցի ընդունման կանոններին: Արյան մեջ հակաբիոտիկի օպտիմալ քանակությունը պահպանելու համար անհրաժեշտ են չափաբաժինների միջև հավասար ժամանակահատվածներ: Որոշ դեղեր ընդունվում են ուտելուց առաջ, իսկ մյուսները՝ հետո: Հետևաբար, նախքան հակաբակտերիալ դեղամիջոց ընդունելը, պետք է ուշադիր ուսումնասիրել օգտագործման ցուցումները և խստորեն հետևել դրա ընդունման կանոններին, հակառակ դեպքում դեղը արդյունավետ չի լինի: Խստիվ արգելվում է դադարեցնել հակաբիոտիկների ընդունումը՝ բարելավման առաջին նշաններից հետո՝ առանց բժշկի իմացության: Միշտ անհրաժեշտ է ամբողջությամբ լրացնել դեղամիջոցի ընդունումը: Կարելի է գրանցել, թե որ դեղամիջոցն եք ընդունել, որքան ժամանակ և ինչ հիվանդության համար: Արժե նշաններ անել, եթե կողմնակի ազդեցությունները կամ ալերգիկ ռեակցիաները առաջանան: Մի՛ փորձեք ինքնուրույն կարգավորել դեղամիջոցի դեղաչափը: Անբավարար քանակությամբ հակաբիոտիկների ընդունումը մեծացնում է պաթոգենների դիմադրողականությունը դեղամիջոցի նկատմամբ, իսկ անվերահսկելի օգտագործումը և հակաբիոտիկի քանակի ավելացումը կարող են բացասաբար ազդել առողջության վրա: Սննդակարգում կատարել համապատասխան ճշգրտումներ: Հակաբիոտիկների օգտագործման ընթացքում պահպանել դիետա: Խորհուրդ չի տրվում օգտագործել ճարպային, տապակած, կծու, թթու կերակուրներ կամ ալկոհոլ:

Չեխիայի նախագահ Պետր Պավելը, որը 2015-2018 թվականներին զբաղեցրել է ՆԱՏՕ-ի ռազմական կոմիտեի ղեկավարի պաշտոնը, հայտարարել է, որ 2023-ին Ուկրաինայում ստեղծված իրավիճակում շրջադարձ կլինի։ «Ակնհայտ է, որ այս տարի որոշակի շրջադարձ պետք է լինի Ուկրաինայում ստեղծված իրավիճակում»,-ինչպես հաղորդում է «Արմենպրես»-ը, վկայակոչելով «ՌԻԱ Նովոստի»-ին, այս մասին նախագահն ասել է լրագրողների հետ հանդիպմանը: Նրա խոսքով՝ վերջին ամիսներին ռազմական գործողություններն ասես ստատիկ կերպ են զարգանում: Նա ընդգծել է, որ Ուկրաինայում իրավիճակի կարգավորման փորձերը կշարունակվեն 2023 թվականին: Ըստ նրա՝ հակամարտող կողմերը կձգտեն բարելավել իրենց բանակցային դիրքերը։ Պետր Պավելը հավանական է համարել, որ Ուկրաինան կձգտի խոշոր հարձակման։

Ռուսաստանը միշտ բաց է բանակցային գործընթացի համար և հարգում է Ուկրաինայի վերաբերյալ չինական ծրագիրը: Ինչպես հաղորդում է «Արմենպրես»-ը, վկայակոչելով «ՌԻԱ Նովոստի»-ին, այս մասին ՌԴ նախագահ Վլադիմիր Պուտինն ասել է Չինաստանի նախագահ Սի Ծինփինի հետ հանդիպմանը: «Մենք անպայման կքննարկենք այդ բոլոր հարցերը, այդ թվում՝ ձեր նախաձեռնությունները, որոնց մենք անխոս հարգում ենք», - ասել է Պուտինը: Սի Ծինփինը Ռուսաստանի նախագահ Վլադիմիր Պուտինի հրավերով մարտի 20-ից 22-ը պետական ​​այցով լինելու է Ռուսաստանում։ Դա կլինի առաջին երկիրը, որը Չինաստանի ղեկավարն այցելում է մարտի 10-ին Ազգային Ժողովրդական Կոնգրեսի (Խորհրդարանի) կողմից երրորդ ժամկետով վերընտրվելուց հետո:

ՀՀ ՊՎԾ-ն շարունակում է պետական միջոցների կառավարման գործընթացների վերահսկողությունը սուբվենցիոն ծրագրերի շրջանակներում. Շիրակի մարզի Անի համայնքում հայտնաբերվել են առերևույթ խախտումներ ՀՀ պետական վերահսկողական ծառայությունն օրենքով իրեն վերապահված վերահսկողական գործառույթների շրջանակներում ՀՀ կառավարության կողմից իրականացվող համայնքների տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրերի մշտադիտարկում է իրականացրել, այդ թվում՝ «Հայաստանի Հանրապետության Շիրակի մարզի Անի համայնքապետարանի աշխատակազմ» համայնքային կառավարչական հիմնարկում: Համայնքը 2018-2021թթ. իրականացրել է 9 սուբվենցիոն ծրագիրեր՝ ՀՀ պետական բյուջեից ստանալով ընդհանուր 278,086,800.0 ՀՀ դրամ գումար: Պետական վերահսկողական ծառայության իրականացրած մշտադիտարկման ընթացքում պարզ է դարձել, որ 2020-2021թվականների ընթացքում, Անի համայնքի Լուսաղբյուր բնակավայրում սուբվենցիոն ծրագրի շրջանակներում իրականացվել են ջրամատակարարման ներքին ցանցի կառուցման աշխատանքներ: Ջրագծի կառուցման համար ընդհանուր առմամբ հատկացվել է 71,749,000.0 ՀՀ դրամ, որից, ՀՀ պետական բյուջեից սուբվենցիոն ծրագրի համար տրամադրվել է 52,444,000.0 ՀՀ դրամ, իսկ համայնքի կողմից՝ 19,305,000. ՀՀ դրամ: Գնումների ոլորտը կանոնակարգող ՀՀ օրենսդրությամբ սահմանված պահանջների համաձայն (ՀՀ կառավարության 2017 թվականի մայիսի 4-ի թիվ 526-Ն որոշում)՝ պայմանագրի կատարման նկատմամբ նախնական հսկողությունն իրականացնում է պատասխանատու ստորաբաժանումը: Պայմանագրի կամ դրա մի մասի կատարման արդյունքներն ընդունվում են պատասխանատու ստորաբաժանման ղեկավարի և գնման պայմանագիր կնքած անձի միջև հանձնման-ընդունման արձանագրության ստորագրմամբ: Արձանագրությունը ստորագրվում է, եթե առկա է պատասխանատու ստորաբաժանման գնման հայտը նախագծած ներկայացուցչի (ներկայացուցիչների) գրավոր դրական եզրակացությունը: Ընդ որում, վերոնշյալ անձը պայմանագրի կամ դրա մի մասի կատարման արդյունքների վերաբերյալ տալիս է դրական եզրակացություն, եթե մատակարարված ապրանքը, կատարված աշխատանքը կամ մատուցված ծառայությունը համապատասխանում են պայմանագրի պայմաններին կամ մատակարարված ապրանքի որակական հատկանիշները գերազանցում են պայմանագրով սահմանված պահանջները՝ ապահովելով կարիքի բավարարումը: Մինչդեռ, հիմք ընդունելով համապատասխան պաշտոնատար անձանց կողմից ներկայացված տեղեկատվությունը և ավարտված շինարարական օբյեկտը շահագործման ընդունող հանձնաժողովի ակտը՝ պարզվել է, որ Անի համայնքի Լուսաղբյուր բնակավայրի ջրամատակարարման ներքին ցանցի կառուցման աշխատանքները կատարվել են նախագծանախահաշվային փաստաթղթերից շեղումներով, օգտագործվել է անորակ հումք, որի արդյունքում ջրամատակարարման ցանցում առաջանում են վթարներ և այն լիարժեք չի շահագործվում: Արդյունքում, սուբվենցիոն ծրագրի շրջանակներում, Լուսաղբյուր բնակավայրի ջրամատակարարման ներքին ցանցի կառուցման աշխատանքները լիարժեք չեն կատարվել և պետության հատկացրած միջոցները ծախսվել են անարդյունավետ և ոչ նպատակային: Հաշվի առնելով կատարված մշտադիտարկման արդյունքները, բավարար հիմքեր կան ենթադրելու, որ «Հայաստանի Հանրապետության Շիրակի մարզի Անի համայնքապետարանի աշխատակազմ» համայնքային կառավարչական հիմնարկի իրավասու պաշտոնատար անձինք առերևույթ թույլ են տվել ՀՀ քրեական օրենսգրքով նախատեսված արարքներ, որոնց հետևանքով էական վնաս է պատճառվել անձանց իրավունքներին, ինչպես նաև պետության օրինական շահերին: Մշտադիտարկման ընթացքում հայտնաբերված նշված դեպքերի վերաբերյալ տեղեկություններն ուղարկվել են ՀՀ գլխավոր դատախազություն՝ իրավական գնահատական տալու և հետագա ընթացքն ապահովելու համար։ ՀՀ քննչական կոմիտեի Շիրակի մարզային քննչական վարչության Արթիկի և Անիի քննչական բաժնում, սույն թվականի մարտի 10-ին, ՀՀ քրեական օրենսգրքի 255-րդ հոդվածի 3-րդ մասի 3-րդ կետի և ՀՀ քրեական օրենսգրքի 446-րդ հոդվածի 2-րդ մասի նախաձեռնվել է քրեական վարույթ, կատարվում է նախաքննություն: ՀՀ պետական վերահսկողական ծառայությունը հետևողականորեն իրականացնում է իրեն վերապահված լիազորությունները՝ բացահայտելու և բացառելու պետական միջոցների անարդյունավետ կառավարումը, ինչպես նաև ՀՀ օրենսդրության հնարավոր խախտումները՝ ապահովելով ՀՀ վարչապետի վերահսկողական լիազորությունների իրականացումը։

Rate.am-ը ներկայացրել է մարտի 20-ի դրությամբ տարադրամի փոխարժեքը։ ԱՄՆ դոլարի առքը միջինը 385.28 դրամ է, վաճառքը՝ 391.78 դրամ: Եվրոյի առքը միջինը 407.50 դրամ է, վաճառքը՝ 421.39 դրամ։ Ռուբլու առքը միջինը 4.83 դրամ է, վաճառքը՝ 5.19 դրամ:

Վերջին 11 տարվա ընդմիջումից հետո Եգիպտոսի և Թուրքիայի հարաբերությունների կարգավորման ուղղությամբ նոր քայլեր են ձեռնարկվում: Ermenihaber-ի փոխանցմամբ՝ ըստ թուրքական մամուլի՝ դրան մեծապես նպաստել է Թուրքիայի արտգործնախարար Մևլյութ Չավուշօղլուի այցը Եգիպտոս և հանդիպումը Եգիպտոսի արտգործնախարար Սամեհ Շուքրիի հետ: Թուրքական աղբյուրի հաղորդմամբ՝ հանդիպմանը բացի բյուրոկրատական հարաբերությունների կարգավորումից, նաև քննարկվել են անհրաժեշտ քայլերի իրականացումն առևտրաշրջանառության ոլորտում: Թուրք-եգիպտական հարաբերությունների կարգավորման վերաբերյալ ուշագրավ վերլուծություն է հրապարակել հունական կողմը, ըստ որի, այս գործողությունները կարող են խաթարել քաղաքական հավասարակշռությունը մի շարք տեղերում, մասնավորապես, Արևելյան Միջերկրականում: Հունական «Militaire» պարբերականը հանդիպման վերաբերյալ «Հունաստանը դու՞րս է մնում» հոդվածում նշում է, որ Թուրքիա-Եգիպտոս հարաբերությունների կարգավորման նոր փուլը Հունաստանի համար լավ զարգացումներ չի ենթադրում: «Չավուշօղլուի այցից հետո Հունաստանի արգործնախարար Նիկոս Դենդիասն արդյո՞ք կհրավիրվի Կահիրե, թե՞ ոչ, օրակարգային հարց է դարձել»,- գրում է հունական թերթը: Հիշեցնենք, որ Թուրքիայի արտգործնախարար Մևլյութ Չավուշօղլուն մարտի 18-ին մեկնել էր Կահիրե և հանդիպել իր Եգիպտացի գործընկերոջ՝ Սամեհ Շուքրիի հետ:

ՆԳՆ ոստիկանության տարբեր ստորաբաժանումների ծառայողները շարունակում են բնակչության հետ ամենօրյա բացատրական աշխատանքը՝ ապօրինի զենք-զինամթերքի կամավոր հանձնման ուղղությամբ։ Արաբկիրի բաժնում արձանագրվել է «Կալաշնիկովի» և զինամթերքի կամավոր հանձնման դեպք՝ շնորհիվ ՀԱԱԳ վարչության ընտանեկան բռնության կանխարգելման բաժնի ծառայողների բացատրական աշխատանքի։ «Կալաշնիկովի» ինքնաձիգների և ռազմամթերքի կամավոր հանձնման դեպքեր են արձանագրվել նաև ոստիկանության Արտաշատի և Տավուշի բաժիններում։ Տարբեր տեսակի հրացանների և ռազմամթերքի կամավոր հանձնման դեպքեր են արձանագրվել ոստիկանության Արթիկի, Աշտարակի և Կումայրիի բաժիններում։ Ոստիկանության Ապարանի և Նաիրիի բաժիններում էլ արձանագրվել են տարբեր տեսակի ատրճանակների և ռազմամթերքի կամավոր հանձնման դեպքեր։ Ոստիկանությունը կրկին հորդորում է ապօրինի զենք-զինամթերքը կամավոր հանձնել ոստիկանություն՝ քրեական պատասխանատվությունից խուսափելու համար։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Լեհաստանում կհայտնվի ԱՄՆ զինված ուժերի առաջին մշտական ​​կայազորը: Ինչպես այսօր հայտնել Է հանրապետության ազգային պաշտպանության նախարարությունը, մարտի 21-ին տեղի կունենա «Լեհաստանի աջակցության տարածաշրջանային խումբը Լեհաստանում ԱՄՆ բանակի կայազորի վերափոխելու արարողությունըե։ Այդ մասին «Արմենպրես»-ը տեղեկանում Է ТАСС գործակալությունից: «Լեհաստանում ԱՄՆ բանակի կայազորը կլինի ԱՄՆ զինված ուժերի ութերորդ մշտական ​​կայազորը Եվրոպայում և ԱՄՆ զորքերի առաջին մշտական ​​կայազորը Լեհաստանում: Ստորաբաժանումը ստեղծվում է 2022 թ.-ին ԱՄՆ նախագահի որոշման շնորհիվ և կզբաղվի Լեհաստանում տեղաբաշխված ամերիկացի զինվորների ենթակառուցվածքային ապահովմամբ: Կայազորի խնդիրները կներառեն նաև Լեհաստանում ամերիկյան զորքերի առաջադիրքերի ղեկավարումն ու կառավարումը», - ասված է հաղորդագրության մեջ։ «ԱՄՆ-ի 5-րդ բանակային կորպուսի հրամանատարությունը, որը գործում է Լեհաստանի տարածքում 2020 թ.-ից, 2022 թ.-ին ստացել է «Կոստյուշկոյի ճամբար» անվանումը: Դրա հիմնական խնդիրն է Եվրոպայում ԱՄՆ ցամաքային զորքերի գործողությունների համակարգումը և վերահսկումը, օպերատիվ պլանավորումը, ինչպես նաև ԱՄՆ-ի ուժերի համագործակցությունն ու սինքրոնացումը ՆԱՏՕ-ի մյուս երկրների զորքերի հետ: Հրամանատարությունն առանցքային դեր է խաղում Լեհաստանում տեղակայված ամերիկյան զորքերի ինտեգրման և մեր զինված ուժերի հետ փոխգործակցության գործում», - նշված է Լեհաստանի պաշտպանության նախարարության հաղորդագրության մեջ։ Լեհաստանում այժմ տեղաբաշխված Է ավելի քան 10 հազար ամերիկացի զինծառայող:

ՀՀ հակակոռուպցիոն կոմիտեում նախաքննությունն ավարտված քրեական վարույթով ապացույցներ են ձեռք բերվել այն մասին, որ Կ. Թ.-ն, զբաղեցնելով «Բուրաստանի առողջության առաջնային պահպանման կենտրոն» պետական ոչ առևտրային կազմակերպության տնօրենի պաշտոնը, Ռ. Գ.-ի, Ա. Ջ.-ի, Լ. Մ.-ի, Մ. Ա.-ի և Ս. Զ.-ի դրդմամբ կատարել է պաշտոնեական կեղծիք, այն է՝ առանց կորոնավիրուսային հիվանդության դեմ փաստացի պատվաստման, մեկ տասնյակից ավելի անձանց տրամադրել է պատվաստված լինելը հավաստող կեղծ սերտիֆիկատներ: Մասնավորապես` պարզվել է, որ Ա. Ջ.-ն, չցանկանալով կորոնավիրուսային հիվանդության դեմ փաստացի պատվաստվել, դիմել է «Արտաշատի բժշկական կենտրոն» ՓԲ ընկերության պոլիկլինիկայի մատենավար Ռ. Գ.-ին և վերջինիս հետ ունեցած մտերիմ հարաբերություններից ելնելով՝ խնդրել նրան իր և իր ներկայացրած անձանց՝ ընտանիքի անդամների համար գումարի դիմաց տրամադրել վերջիններիս պատվաստված լինելը հավաստող կեղծ սերտիֆիկատներ: Ռ. Գ.-ն ընդունել է առաջարկը, ապա՝ Ա. Ջ.-ից ստացել նախապես պայմանավորված 330.000 ՀՀ դրամը: Այնուհետև Ռ. Գ.-ն, օգտագործելով վերը նշված ՊՈԱԿ-ի տնօրեն Կ. Թ.-ի հետ ազգակցական կապի մեջ գտնվելու հանգամանքը, դիմել է նրան: Կ. Թ.-ն, Ռ. Գ.-ին չմերժելու անձնական դրդումներով, կատարել է վերջինիս խնդրանքը՝ Ա. Ջ.-ին և նրա ներկայացրած անձանց տրամադրելով կեղծ սերտիֆիկատներ: Այնուհետև Կ. Թ.-ի պահանջով վերը նշված անձանց պատվաստված լինելու վերաբերյալ կեղծ տվյալները ՊՈԱԿ-ի մեկ այլ աշխատակցի կողմից մուտքագրվել են ՀՀ-ում էլեկտրոնային առողջապահության միասնական տեղեկատվական «Արմեդ» համակարգ: Նույն եղանակով Ռ. Գ.-ն պայմանավորվածություն է ձեռք բերել Լ. Մ.-ի ու Մ. Ա.-ի հետ և նրանցից ստացել համապատասխանաբար 40.000 և 50.000 ՀՀ դրամ գումարներ: Այնուհետև Ռ. Գ.-ն կրկին դիմել է ՊՈԱԿ-ի տնօրեն Կ. Թ.-ին, ով նրա ներկայացրած անձանց՝ Լ. Մ.-ին, նրա որդուն և Մ. Ա.-ին տրամադրել է կորոնավիրուսային հիվանդության դեմ պատվաստված լինելը հավաստող կեղծ սերտիֆիկատներ: Վերը նշված հանցավոր արարքների համար Կ. Թ.-ին մեղադրանք է ներկայացվել ՀՀ նախկին քրեական օրենսգրքի 314-րդ հոդվածի 1-ին մասով /4 դրվագ/: Քրեական վարույթով նախաքննությունն ավարտվել է: Վարույթի նյութերը մեղադրական եզրակացությամբ հանձնվել են հսկող դատախազին՝ այն հաստատելու և դատարան ուղարկելու միջնորդությամբ: Քրեական վարույթի շրջանակում մեղադրանքներ են ներկայացվել նաև Ռ. Գ.-ին, Լ.Մ.-ին, Մ. Ա.-ին, Ա. Ջ.-ին, Ս. Զ.-ին ու ևս երկու անձի, որոնց վերաբերյալ նախաքննությունը շարունակվում է: Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Եվրոպայի առաջնությունից մեկ արծաթե, 3 բրոնզե մեդալով Հայաստան վերադարձած հունահռոմեական ըմբշամարտի հավաքականի անդամներն այսօր խոսել են ադրբեջանցի մարզիկի պահվածքի մասին: Մինչև 23 տարեկանների Եվրոպայի առաջնության ժամանակ 1:7 հաշվով պարտվելուց հետո ադրբեջանցին հարվածել էր մեր ըմբիշին՝ Կարապետ Մանվելյանին: Ադրբեջանցուն որակազրկել էին: Այսօր հավաքականի գլխավոր մարզիչը պատմել է, որ գոտեմարտից հետո ադրբեջանցի պատվիրակները ներողություն են խնդրել մերոնցից միջադեպի համար:

Ազատ ոճային ըմբիշ, 92 կգ քաշային Սերգեյ Սարգսյանին 8-5 հաշվով պարտվելուց հետո ադրբեջանցի ըմբիշը չի կարողացել զսպել արցունքները։

Այսօր՝ մարտի 20-ին, ողբերգական դեպք է տեղի ունեցել Երևանում։ Ժամը 15։00-ի սահմաններում ՀՀ Ներքին գործերի նախարարության Ոստիկանության Շենգավիթի բաժին ահազանգ է ստացվել, որ Աերացիա թաղամասով անցնող գնացքի գծերի վրա քաղաքացին ընկել է գնացքի տակ և տեղում մահացել։ Ինչպես հայտնում է ֆոտոլրագրող Գագիկ Շամշյանը՝ դեպքի վայր են ժամանել Ոստիկանության Շենգավիթի բաժնի պետ Կարեն Բունիաթյանը, Ոստիկանության Չարբախի բաժանմունքի պետ Արման Կիրակոսյանը և բաժանմունքի պետի տեղակալ Դավիթ Փանոյանը։ Օպերատիվորն ժամանել են նաև «Հարավկովկասյան երկաթուղի» ՓԲԸ-ի անվտանգության ծառայության աշխատակիցները՝ ծառայության պետ Արամ Սահակյանի գլխավորությամբ: Օպերատիվորեն ժամանել են նաև Երևանի 103 շտապօգնության թիվ 63 բժիշկների խումբը, ովքեր արձանագրել են քաղաքացու մահը։ Բժիշկները նաև հավանաբար մահացածի հարազատներին տեղում բուժօգնություն ցուցաբերեցին, քանի որ նրանց ինքնազգացողությունը վատացել էր։ Ոստիկանության Չարբախի բաժանմունքի ծառայողները օպերատիվ տվյալներով պարզել են, որ մահացածը Երևանի բնակիչ 71-ամյա Ալվարդ Թ․-ն է։ Ոստիկանությունն ու քննչական բաժինը պարզում են բեռնատար գնացքավարի ինքնությունը և ունեն նաև օպերատիվ տեղեկություններ, որ գնացքավարը նկատել է գնացքի գծերի վրայով անցնող քաղաքացուն, մի քանի անգամ շչակ է միացրել, սակայն դա օգուտ չի տվել, իսկ գնացքը չէր կարող կտրուկ արգելակել։

Արտակ Զաքարյանը ֆեյսբուքյան իր էջում գրում է․ 100 օր շրջափակման մեջ Արդեն հարյուր օր է ինչ Արցախի 120.000 բնակիչները շրջափակման մեջ են, որը փաստացի նախաձեռնվել և շարունակվում է Ադրբեջանի իշխանությունների կողմից: Գրեթե բոլոր «շահագրգիռ» խոշոր երկրներն ու կառույցները հանդես են եկել Արցախն ապաշրջափակելու կոչերով ու պահանջներով: Հարյուր օր անց այս հարցը ոչ միայն չի լուծվել, այլև որոշակի առումով փակուղի է մտել Բաքվի մշտական ​​նոր պահանջների պատճառով, որոնք ոչ մի կապ չունեն Հայաստանի, Ռուսաստանի և Ադրբեջանի ղեկավարների` 2020թ. նոյեմբերի 9-ի եռակողմ հայտարարության հետ: Արցախը շարունակում է իր համառ պայքարը Հայաստանի պետականության պահպանման և Արցախի ապագա համար:

Վարչապետ Նիկոլ Փաշինյանը հեռախոսազրույց է ունեցել Ամերիկայի Միացյալ Նահանգների պետքարտուղար Էնթոնի Բլինքենի հետ: Զրուցակիցները քննարկել են Ադրբեջանի կողմից Լաչինի միջանցքի ապօրինի շրջափակման հետևանքով ստեղծված հումանիտար ճգնաժամին վերաբերող հարցեր: Նիկոլ Փաշինյանը և Էնթոնի Բլինքենը մտքեր են փոխանակել Հայաստան-Ադրբեջան հարաբերությունների կարգավորման, տարածաշրջանում հաղորդակցության ուղիների բացման հեռանկարների շուրջ: ԱՄՆ պետքարտուղարը վերահաստատել է Լաչինի միջանցքն անհապաղ վերաբացելու մասին իր կոչը և ընդգծել, որ ԱՄՆ-ն պատրաստակամ է շարունակել աջակցությունը վերոնշյալ գործընթացներին: Հեռախոսազրույցի ընթացքում վարչապետ Փաշինյանը մտահոգություն է հայտնել վերջին շրջանում Ադրբեջանի կողմից աճող ագրեսիվ հռետորաբանության կապակցությամբ:

Հոլիվուդյան դերասանուհի Շերոն Սթոունը հայտնել է, որ ԱՄՆ-ում տեղի ունեցած վերջին բանկային ճգնաժամի ժամանակ կորցրել է իր ունեցած գումարի կեսը։

Գեներալ Գրիգորի Խաչատուրովը կալանովորվել է մի հովվի ցուցմունքի հիման վրա: Փողերի լվացման համար կասկածվող Խաչատուրովի պաշտպանի խոսքով՝ հովիվն իր ցուցմունքում գրել է, որ մի մահացած մարդուց է լսել, թե գործում հիշատակվող հողը Խաչատուրովինն է: Դատախազությունը նշում է, որ ապօրինի օտարված տարածքը զորամաս է եղել, մինչդեռ, փաստաբանների խոսքով՝ «երբևիցե այդ տարածքը որպես զորամաս չի ծառայել։

Հայաստանի կանանց բռնցքամարտի ընտրանու անդամ, Եվրոպայի չեմպիոն Անի Հովսեփյանը պարտվեց աշխարհի առաջնության մեկնարկում: «Արմենպրես»-ի հաղորդմամբ` Հնդկաստանի մայրաքաղաք Նյու Դելիում ընթացող աշխարհի կանանց առաջնության մեկնարկային մենամարտում Հովսեփյանը ուժերը չափեց Չինաստանի ներկայացուցիչ Պան Ժուի հետ: Մրցավարների որոշմամբ հաղթեց չինացի մարզուհին` 5:0 հաշվով: Ավելի վաղ Հայաստանի հավաքականի կազմում հաղթանակ էին տոնել Էլիդա Քոչարյանը և Անուշ Գրիգորյանը: Պարտություն էին կրել Գայանե Տեր-Բարսեղյանը և Եկատերինա Սիչևան:

Իսրայելը համաձայնել է չորս ամսով դադարեցնել պաղեստինյան տարածքներում նոր բնակավայրերի կառուցման քննարկումները և վեց ամսով՝ առաջադիրքերի կառուցման թույլտվությունների տրամադրումը։ «Արմենպրես»-ի փոխանցմամբ՝ այս մասին հաղորդում է The Times of Israel-ը՝ վկայակոչելով մարտի 19-ին Իսրայելի, Պաղեստինի, Եգիպտոսի, Հորդանանի և ԱՄՆ-ի արած համատեղ հայտարարությունը։ Եգիպտոսի ​​Շարմ էլ-Շեյխ քաղաքում անցկացված բանակցությունների ընթացքում կողմերը պայմանավորվել են աշխատել ապաէսկալացման, «հետագա բռնության կանխարգելման» ուղղությամբ և հայտնել են իրենց հանձնառությունը «անվտանգությանը, կայունությանն ու խաղաղությանը ինչպես իսրայելցիների, այնպես էլ պաղեստինցիների համար»: «Իսրայելի կառավարությունը և Պաղեստինի ազգային վարչակազմը հաստատել են իրենց պատրաստակամությունը և համատեղ հանձնառությունը՝ երեքից վեց ամիս ժամկետով անհապաղ դադարեցնել միակողմանի միջոցները», - ընդգծվում է հայտարարության մեջ։ Associated Press գործակալությունը հիշեցնում է, որ Իսրայելի և Պաղեստինի պատվիրակությունները մեկ ամսից պակաս ժամանակաշրջանում երկրորդ անգամ են հանդիպել Եգիպտոսի, Հորդանանի և Միացյալ Նահանգների միջնորդությամբ՝ ճգնաժամի ապաԷսկալացման հասնելու համար: Ճգնաժամը սրվել Է վերջին ամիսներին: Այս ժամանակաշրջանում ավելի քան 200 պաղեստինցի է զոհվել իսրայելական բանակի գործողությունների հետևանքով, իսկ ավելի քան 40 իսրայելցի զոհվել է պաղեստինցիների հարձակումների ժամանակ։ Հաջորդ հանդիպումը նախատեսված Է ապրիլին, այն նույնպես կանցկացվի Եգիպտոսում։ Փետրվարին կայացած նախորդ հանդիպումից հետո Իսրայելի վարչապետ Բենյամին Նեթանյահուն հայտարարել էր, որ Իսրայելի իշխանությունները չեն չեղարկում Հորդանան գետի Արևմտյան ափի բնակավայրերում նոր բնակարաններ կառուցելու՝ արդեն հավանության արժանացած պլանները։