Լրահոս

Հայաստանի զինված ուժերում շարունակվում են սահմանափակումները՝ սուր շնչառական վարակների ու եղանակային անբարենպաստ պայմանների պատճառով: Պաշտպանության նախարարությունից տեղեկացնում են, որ տեսակցությունները բանակում սահմանափակվել են, զինվորներին արգելվում է ազատ արձակումներն ու արձակուրդների տրամադրումը: Ընդամենը երկու օր առաջ հայտնի դարձավ հոսպիտալում զինծառայողի մահվան մասին: Արտակ Վարդանյանը Սիսիանից էր: Ծառայում էր Իջևանում: Սիսիանի բնակիչների խոսքով՝ զինվորի մահվան պատճառը թոքաբորբն է: Պաշտպանության նախարարությունից չեն հաստատում այս տեղեկությունը: «Ըստ բժշկական նախնական գնահատականի՝ հիվանդությունն ունեցել է կայծակնային ընթացք, ձեռնարկված բուժական հրատապ և անհետաձգելի միջոցառումներն ու գործադրված ջանքերը, ցավոք, արդյունք չեն տվել»,- «Հայլուր»-ի հետ զրույցում ասել է ՊՆ խոսնակը:

2024-ի ընթացքում մոտ 1290 զանգ և այց ենք ունեցել Երևանի և Գորիսի մեր գրասենյակներում` հակամարտության սրացումների արդյունքում ընտանիքների բաժանման առնչությամբ, հայտնում են Կարմիր խաչի միջազգային կոմիտեից։

Փետրվարի 21-ից 24-ը ՆԳՆ ոստիկանության ստորաբաժանումները բացահայտել են հանցագործության 180 դեպք, որոնցից 7-ը՝ նախկինում կատարված: Հայտնում են ՆԳՆ-ից:

Մարսելում ՌԴ հյուպատոսարանի մոտ, նախնական տվյալներով, պայթյուն է եղել, հայտնում են ֆրանսիական լրատվամիջոցները:

Հայլուր 12։30 Սուր շնչառական վարակներ՝ բանակում. սահմանափակումները շարունակվում են

Բարձրագույն դատական խորհրդի որոշմամբ՝ դատավոր Արմինե Սաֆարյանին հայտարարվեց խիստ նկատողություն։ Այս մասին հայտնում է Բարձրագույն դատական խորհուրդը:

Անկարայում ընթանում է Թուրքիայի ԱԳ նախարար Հաքան Ֆիդանի և ՌԴ ԱԳ նախարար Սերգեյ Լավրովի հանդիպումը: ՌԴ ԱԳ նախարարն այնուհետև կհանդիպի Թուրքիայի նախագահ Ռեջեփ Թայիփ Էրդողանի հետ, հայտնում է ՏԱՍՍ-ը:

Փետրվարի 25-ին՝ ժամը 10:00-ից մինչև 14:00-ն ընկած ժամանակահատվածում, Կոտայքի մարզի Գառնի համայնքի Գեղարդ և Գողթ բնակավայրերում փորձարկվելու են էլեկտրական շչակներ: Այս մասին հայտնում է ՆԳՆ փրկարար ծառայությունը։

«Փետրվարի 25-ին` ժամը 09:30-ին, ԱԺ ոսկեզօծ դահլիճում տեղի կունենա ԵՄ-Հայաստան խորհրդարանական գործընկերության կոմիտեի 4-րդ նիստը: Նշենք, որ նիստի անգլերենով ուղիղ հեռարձակմանը կարող եք հետեւել ԱԺ պաշտոնական կայքէջում եւ յութուբյան ալիքում:

Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը փակ է միայն բեռնատարների համար։

Հարկ վճարողների կողմից 2025 թվականի հունվար ամսվա համար ներկայացված եկամտային հարկի և սոցիալական վճարի հաշվարկների տվյալներով` եկամուտ ստացող աշխատատեղերի թվաքանակը կազմել է 754,839, ինչը գերազանցել է նախորդ տարվա նույն ամսվա ցուցանիշը` 41 124-ով կամ 5.8 %-ով: Այս մասին տեղեկացնում է ՊԵԿ-ը:

Թեև Ադրբեջանից որոշակի պարբերականությամբ Հայաստանի հետ բանակցությունների տարբեր դրույթների վերաբերյալ հայտարարություններ հնչեցվում են, սակայն տպավորություն ունեմ, որ Բաքուն սպասողական փուլում է: Այս մասին ֆեյսբուքյան իր էջում գրել է ԱԺ «Պատիվ ունեմ» խմբակցության քարտուղար Տիգրան Աբրահամյանը։

Փետրվարի 24-ին՝ ժամը 9:00-ի դրությամբ, Ջերմուկի խաչմերուկից մինչև Կապան ավտոճանապարհները փակ են ծանրաքաշ և կցորդով տրանսպորտային միջոցների համար։ 

Քամին հարավարևմտյան 3-6մ/վ, սպասվում է քամու ուժգնացում փետրվարի 24-ին և 26-ին` 15-18 մ/վ արագությամբ, 25-ին՝ 17-20մ/վ։

Սպառած էլեկտրաէներգիայի, անջատումների, Ձեր իրավունքներին կամ պարտականություններին վերաբերող, ինչպես նաև այլ հարցերի առնչությամբ կարող եք զանգահարել 1-80 և 0 8000 0 180 շուրջօրյա գործող հեռախոսահամարներով:

Ռուսաստանի արտաքին գործերի նախարար Սերգեյ Լավրովը այցով ժամանել է Թուրքիայի մայրաքաղաք, հայտնում է «ՌԻԱ Նովոստի»-ի թղթակիցը։ Անկարա կատարած այցից մի քանի օր առաջ նախարարը եղել է Հարավային Աֆրիկայում, որտեղ G20 նախարարական համաժողովի շրջանակում հանդիպել է Թուրքիայի արտգործնախարար Հաքան Ֆիդանի հետ՝ ի թիվս այլ հարցերի, քննարկելով Ռուսաստանի և ԱՄՆ-ի միջև խորհրդակցությունների արդյունքները, Ուկրաինայի և Սիրիայի շուրջ բանակցային գործընթացը։ Ակնկալվում է, որ Լավրովը կշարունակի քննարկել միջազգային իրավիճակի տարբեր ասպեկտները, ինչպես նաև երկկողմ հարաբերությունները։

Թոքաբորբով հոսպիտալացված Հռոմի Ֆրանցիսկոս պապի առողջական վիճակը շարունակում է մնալ ծանր, սակայն շաբաթ օրվանից նա շնչառական նոպա չի ունեցել, «ՌԻԱ Նովոստի»-ի փոխանցմամբ՝ հայտնել է Վատիկանի մամուլի ծառայությունը։ «Հռոմի պապի վիճակը շարունակում է մնալ ծանր, սակայն երեկ երեկոյան նա այլևս շնչառական նոպաներ չի ունեցել»,- ասվում է Վատիկանի մամուլի ծառայության հաղորդագրության մեջ։ Զեկույցում նշվում էր, որ նա ենթարկվել է արյան կարմիր բջիջների փոխներարկման երկու պրոցեդուրաների՝ հեմոգլոբինի մակարդակը բարձրացնելու համար։ Ցածր թրոմբոցիտների քանակը (թրոմբոցիտոպենիա) մնաց կայուն, սակայն որոշ արյան թեստեր ցույց են տալիս վաղ թեթև երիկամային անբավարարություն, որն այժմ վերահսկվում է: Նա շարունակում է քթի միջոցով բարձր հոսքով թթվածնային թերապիա ստանալ։ «Հռոմի պապը մնում է գիտակից և կողմնորոշված: Կլինիկական պատկերի բարդությունը և դեղաբանական թերապիայի պատասխանին սպասելու անհրաժեշտությունը պահանջում են, որ կանխատեսումը մնա զգուշավոր», - հավելել է Վատիկանի մամուլի ծառայությունը:

Գերմանիայի ներկայիս կանցլեր Օլաֆ Շոլցը խոստովանել է Բունդեսթագի ընտրություններում Սոցիալ-դեմոկրատական ​​կուսակցության (SPD) պարտությունը, հայտնում է «ՌԻԱ Նովոստի»-ն։ «Սա դառը ընտրությունների արդյունք է Սոցիալ-դեմոկրատական ​​կուսակցության համար: Սա պարտություն է ընտրություններում: Այս անգամ ընտրությունների արդյունքը վատ է, և, հետևաբար, ես նույնպես պատասխանատվություն եմ կրում ընտրությունների այս արդյունքի համար», - ասել է Շոլցը: ZDF հեռուստաալիքի Forschungsgruppe Wahlen հետազոտական ​​ինստիտուտի էքզիթ-փոլի համաձայն՝ Գերմանիայի Սոցիալ-դեմոկրատական ​​կուսակցությունը միայն երրորդ տեղում է՝ 16,3%: Բունդեսթագի ընտրություններում առաջատար է CDU/CSU դաշինքը՝ 28,4 տոկոսով։ Երկրորդ տեղում է Alternative for Germany-ն՝ 20,1%: «Ահա թե ինչու այստեղ ինձ համար առաջինը պետք է շնորհավորել CDU/CSU-ին, CDU-ի նախագահ Ֆրիդրիխ Մերցին հաջորդ կառավարությունը ձևավորելու իր հանձնարարության կապակցությամբ: Շնորհավորում եմ ընտրությունների արդյունքների կապակցությամբ», - նշել է Շոլցը: Կիրակի օրը Գերմանիայում տեղի են ունեցել արտահերթ խորհրդարանական ընտրություններ, որոնց ընտրատեղամասերը բացվել են տեղական ժամանակով ժամը 08:00-ին և փակվել 18:00-ին (Մոսկվայի ժամանակով 20:00-ին): ZDF-ի տվյալներով՝ մասնակցությունը ռեկորդային է եղել՝ 83%:

«Ուրարտուն» նոր ֆուտբոլիստ ունի։ Ակումբը պայմանագիր է ստորագրել կիսապաշտպան Արտեմի Գունկոյի հետ։ Այդ մասին հայտնում է ակումբի մամուլի ծառայությունը։ 20-ամյա ֆուտբոլիստը համարվում է Մոսկվայի «Սպարտակի» սան։ Նա կարիերան անցկացրել է այդ ակումբի համակարգում, որից հետո միացել «Կոսմոս Դոլգոպրուդնի» թիմին։

Մինչև «Կանաչապատում և շրջակա միջավայրի պահպանություն» ՀՈԱԿ-ի և Կենտրոն վարչական շրջանի աշխատակիցները ոչ աշխատանքային օրերին զբաղված են քաղաքացիների անվտանգությունն ապահովելու համար ձնամաքրում իրականացնելով՝ որոշ վանդալներ հատել են Աբովյան 38 հասցեի տասնամյակների խաղողի վազը, որը յուրատեսակ գեղեցկություն էր հաղորդում շենքին, հանդիսանում էր տարածքի խորհրդանիշը: Այդ մասին հայտնում են ԿՇՄՊ ՀՈԱԿ-ից։ Դեպքի հետ կապված «Կանաչապատում և շրջակա միջավայրի պահպանություն» ՀՈԱԿ-ը դիմել է ոստիկանություն։