Կեղծված ընտրությունների հետևանքը․ ինչ է կատարվում ՔՊ-ի ներսում․ «Հրապարակ»

«Հրապարակ» թերթը գրում է. «Չնայած իշխող «Քաղպայմանագրում» փորձում են ծածկադմփոց անել կուսակցության վարչության ընտրությունների կեղծումը, և այս ուղղությամբ պաշտոնանկությունների, քրեական գործի տեսքով գործընթացներ չկան, սակայն իրականում կուսակցության ներսում ծանր մթնոլորտ է ձևավորվել՝ բոլորը բոլորին ատում են, բոլորը բոլորին կասկածում, հաճախ լուրջ բախումներ, գզվռտոց է լինում, բայց զավեշտալին այն է, որ ամենատուժողի, ամենամերժվածի կարգավիճակում հայտնվել է ՔՊ ընտրակեղծիքը բացահայտած և բողոքարկման գործընթացի պահանջ ներկայացրած անձը՝ Արսեն Թորոսյանը։

ՔՊ մեր աղբյուրները հայտնում են, որ Նիկոլ Փաշինյանը չի կարողանում մարսել Թորոսյանի «հանդգնությունը», ով իր ըմբոստությամբ բիծ գցեց ՔՊ-ի՝ թվացյալ մաքուր ու անբասիր անվան վրա։ Չմոռանանք, որ Նիկոլ Փաշինյանի ամենամեծ հաղթաթուղթն իբր Հայաստանում մաքուր և արդար ընտրությունների ավանդույթի ձևավորումն էր, ինչը նախկինների աքիլեսյան գարշապարն էր։ Իսկ իրենց թիմակից Արսեն Թորոսյանը միամտաբար և միայնակ պատռեց կուսակցության դիմակը և ի ցույց դրեց, թե ինչպես են ՔՊ-ականներն ընտրություն կազմակերպում՝ խայտառակելով Նիկոլ Փաշինյանին և նրան զրկելով գլուխ գովելու միակ լեգիտիմ հնարավորությունից։ Ուստի Փաշինյանը որոշել է ինչ-որ պահի Թորոսյանին արժանի պատիժ տալ։

Մեզ ասացին, որ վարչապետն իրավապահ կառույցներին հանձնարարել է՝ ուսումնասիրություններ սկսել Թորոսյանի՝ առողջապահության նախարար աշխատած ժամանակաշրջանի վերաբերյալ և, առհասարակ, ջրի երես հանել Թորոսյանի գործած «մեղքերն» ու ներկայացնել իրեն։ Թե ինչ զարգացումներ կստանան իրավական գործընթացները, թիմում դժվարանում են կանխատեսել, չեն բացառում, որ Փաշինյանն ընդամենը փորձում է Թորոսյանին «իջեցնել օդերից», որ այստեղ-այնտեղ գլուխ չգովի, թե թիմում ինքը միակ մաքուր տղան է, առավել ևս՝ հանրության աչքին հերոս չերևա։ Հիշեցնենք, որ մամուլը բազմիցս է գրել, որ Թորոսյանը կապեր ունի միջազգային կառույցների և հատկապես սորոսական սեգմենտի հետ։

Ավելին, ՔՊ-ական պատգամավորներն էլ են իրենց հերթին Թորոսյանին անկյուն մղել, և նա խմբակցությունում մեկուսացած է՝ «սպիտակ ագռավի» կարգավիճակում։ Թերևս սրանով է պայմանավորված, որ երեկ խորհրդարանում Թորոսյանը փոխարինում էր բացակայող ընդդիմությանը և զբաղված էր կառավարության ներկայացուցիչների ու իր գործընկերների քննադատությամբ։

Արսեն Թորոսյանն ակտիվ էր ոչ միայն առողջապահական թեմաների առնչությամբ դիտարկում-քննարկումներով, այլև՝ առհասարակ։ Ահա մի դրվագ, որը պատկերացում կտա ասվածի մասին։ Խորհրդարանը երեկ քննարկում էր «Հայաստանի Հանրապետության քաղաքացու անձնագրի մասին» օրենքում փոփոխություններ և լրացում կատարելու մասին նախագիծը: Մեր երկրում կենսաչափական անձնագրերը, այդ թվում՝ նույնականացման քարտերը, տրամադրվում են 2012 թվականի հունիսից սկսած։ Դրանց զուգահեռ՝ տրամադրվում են նաև հին նմուշի անձնագրեր:

«Նույնականացման քարտերի մասին» օրենքով սահմանվել էր, որ 2023-ի հունվարի 1-ից դադարեցվելու էին հին անձնագրերի տրամադրումը, փոխանակումը, սակայն հիմա առաջարկվում է 1 տարով հետաձգել այդ դրույթի իրագործումը: Մինչև 2023-ի դեկտեմբերի 31-ը պետք է հին անձնագրերը փոխարինվեն նոր, նույնականացման՝ ID քարտերով: Սկզբում կտրամադրեն առանց էլեկտրոնային պահոցի, մինչև կառավարությունը սահմանի դրանց տեխնիկական բնութագրերը:

Փոխոստիկանապետ Արա Ֆիդանյանի կողմից նախագիծը ներկայացնելուց հետո Արսեն Թորոսյանը դժգոհեց. «Լինելով ՀՀ քաղաքացի՝ մի քիչ լավ չեմ պատկերացնում՝ ինչպե՞ս է ոստիկանության աշխատակիցը որոշելու իմ կարիքը՝ ես ունե՞մ ID քարտի կարիք, թե՞ չունեմ: Չեմ ուզում մտածել այդպես, բայց այստեղ կարող է լինել խնամի-ծանոթ-բարեկամ լուծումը, կարող է պարզվի, որ եթե մեկը ծանոթ է, ուրեմն իր կարիքը կարիք է, մյուսինն այնքան էլ կարիք չի: Նման մեխանիզմ ներդնելու փոխարեն պետք է պարզապես, հաշվի առնելով մեծ պահանջարկը, ապահովել պատշաճ մատակարարումներ և հզորությունների մեծացում: Լավ պլանավորման և աշխատելու շնորհիվ մեր քաղաքացիները ստիպված չէին լինելու իրենց կարիքն ապացուցել»:

Արսեն Թորոսյանը նաև հարցրեց՝ ինչո՞ւ է 1 տարով կասեցվում կենսաչափական անձնագրերի տրամադրումը, դրանք լավն էին ու ժամանակակից. «Այն քաղաքացիները, որոնց ID քարտերի ժամկետը լրանալու է, ասենք թե, հունվարի 15-ին, պետք է վերադառնան հին անձնագրերին: Կարծես թե հետընթաց ենք ապրում, ոչ թե առաջընթաց»: Պատգամավորի հարցերին կցկտուր պատասխան տված փոխոստիկանապետին շտապեց փրկել նախկին «գայիշնիկ», ՔՊ-ական պատգամավոր Արմեն Խաչատրյանը՝ իր ելույթում պատասխանելով Թորոսյանին։ Նա ասաց, որ ներկայումս կառավարությունում մշակվում են իրական կենսաչափական անձնագրերի չափանիշները. «Գաղտնիք չէ, որ նույնականացման քարտերը տրամադրելիս նաև տրամադրվում է էլեկտրոնային հասցե, բայց երբևէ այդ հասցեները չեն օգտագործվել, օգտագործումը խրթին է ու բարդ: Այն կենսաչափական անձնագիրը, որը տրվել է մինչ այսօր, համարվում է ոչ բավարար տեխնիկական չափանիշներին: Կառավարությանը պետք է ևս 1 տարի՝ այդ աշխատանքներն ավարտելու համար»: Արսեն Թորոսյանը հեգնեց. «Հետաքրքիր բաներ ասացիք կենսաչափական անձնագրերի ոչ բավարար լինելու մասին, ինչն ինձ համար նորություն էր, որովհետև վերջին 10 տարում հակառակի մասին ենք միշտ լսել, որ կենսաչափական անձնագրերը հենց այն անձնագրերն են, որոնք ամեն ինչ պարունակում են: Բայց պարզվում է՝ ամեն ինչ չեն պարունակում, այնքան էլ կենսաչափական չեն՝ կոպիտ ասած: Բայց մենք կարո՞ղ ենք հիմա այստեղ բոլորով պայմանավորվել, որ այլևս երբեք չենք երկարացնելու նախորդ անձնագրերի գործողության ժամկետը ու մի տարի հետո այստեղ նույն հարցը չենք քննարկելու»:

ՔՊ-ի առողջ հատվածում կարծում են՝ քանի դեռ չի բացահայտվել վարչության ընտրությունների կեղծիքը, և իրական մեղավորները պատասխանատվության չեն ենթարկվել, կուսակցությունում ավելի վատ բաներ են տեղի ունենալու, որոնց համար նախադրյալների պակաս չկա։ Երեկվա նիստից ևս կարելի է պատկերացնել, թե ինչ տրամադրություններ են թիմի ներսում։

Նշենք նաև, որ Արսեն Թորոսյանը միակը չէ, ում Փաշինյանը ցանկանում է իր տեղը ցույց տալ, պաշտպանության նախարար, ընտրակեղծարարության ենթադրյալ կազմակերպիչ Սուրեն Պապիկյանը ևս Փաշինյանի «սև ցուցակում» է։ ՔՊ-ում նկատել են, որ Պապիկյանը, ով պատվից վեր էր համարում իր ղեկավարած ոլորտի վերաբերյալ նախագծերի քննարկումների ժամանակ ներկայանալ ԱԺ հանձնաժողովների նիստերին, վերջին շաբաթներին խելոք գալիս է։ Իսկ վերջին նիստին էլ Փաշինյանի հնազանդներից մեկը՝ Հայկ Սարգսյանը, փորձեց բռնել Պապիկյանի վախը՝ ասելով, որ ժամանակն է խոսել բանակում առկա խնդիրների մասին»։

Մանրամասները՝ թերթի այսօրվա համարում։