Ղազախստանում ամուսնական զույգը Պուտինի պատճառով բաժանվում է

Ղազախստանում Վիկտորիա անունով կինն ամուսնուն դուրս է հանել բնակարանից և պատրաստվում է բաժանվել նրանից, որի հետ ամուսնացած է արդեն 8 տարի։ Պատճառն այն է, որ անցած ամսվանից ամուսինը տարվել է քաղաքականությամբ և մոռացել իր ընտանիքի մասին՝ ոչ աշխատում է, ոչ ժամանակ տրամադրում երեխաներին, գրում է caravan.kz-ը:

«Ալեքսեյը միշտ հետաքրքրվել է քաղաքականությամբ, նա համացանցում կարդում էր պետությունների պատմության մասին հոդվածներ, հիանում  որոշ պատմական դեմքերով:

Իսկ վերջին երկու տարիներին նրա կուռքը ՌԴ նախագահ Վլադիմիր Պուտինն է։ Ամուսինս մեջբերումներ է անում նրանից, երեք անգամ վերադիտում Պուտինի ասուլիսները, ինչպես նաև փորձում էր ինձ ու մորս քարոզել, որ տեղափոխվենք Ռուսաստան։ Ինչո՞ւ, զարմանում եմ, երբ մենք նորմալ ապրում ենք Ղազախստանում։

Ամեն ինչ կա՝ աշխատանք, բնակարան, մեքենա, քոթեջ, դուստրը մեծանում է»,- պատմել է կինը:

Վիկտորիայի խոսքով՝ այն պահից, երբ ՌԴ-ն Ուկրաինայում սկսել է հատուկ ռազմական գործողություն,  ամուսինը «խորասուզվել է լուրերի մեջ»։

«Նա ամբողջ օրը հեռուստաալիքներ է նայում, զոմբիի պես սնվում է, օղի խմում հեռուստացույցի առջև, բղավում մեր վեց տարեկան երեխայի վրա, երբ նա անցնում է և խանգարում հեռուստացույց նայելուն: Փորձեցի խոսել ամուսնուս հետ, ասել, որ պատերազմն այնտեղ է, և չպետք է խանգարի ընտանեկան կյանքին։ Իսկ նա բղավում է. «Լռի՛ր, կին, արցունքներով Վովային չես օգնի»: 

Ես բարկացա, տնից վռնդեցի ու ասացի, որ այդ դեպքում թող Պուտինը նրան կերակրի, հագցնի ու խնամի։ Իսկ իմ ընտանիքն ունի իր քաղաքականությունը՝ բոլորը պետք է հոգ տանեն միմյանց մասին», - պատմել է կինը:

Վիկտորիայի ամուսինը, նրա խոսքով, համաձայն է ամուսնալուծությանը, և հենց այն գրանցվի, կմեկնի Ռուսաստան։

«Այստեղ միայն տարօրինակ կլինի, եթե ես դատարանին ասեմ ամուսնալուծության պատճառները,- հառաչել է կինը,- ստացվում է, որ այդ մարդը Պուտինի պատճառով կորցնում է իր ընտանի՞քը»։