Երեկ զոհված Վահան Թաթոսյանը 44-օրյա պատերազմի մասնակից էր. փրկել է մի շարք վիրավորների

Երասխի հայ-ադրբեջանական սահմանին երեկ հակառակորդի արձակած կրակոցից զոհված ավագ ենթասպա Վահան Թաթոսյանն Արմավիրի մարզի Ջրառատ համայնքից էր։

Արդեն 10 տարուց ավել է, ինչ Վահան Թաթոսյանն ընտանիքի՝ կնոջ և երկու երեխաների հետ տեղափոխվել էր Արարատի մարզ, քանի որ այնտեղ էր աշխատում։

«Փաստինֆո»-ի հետ զրույցի ժամանակ Ջրառատի համայնքապետ Սամվել Գալստյանը Վահան Թաթոսյանին բնութագրեց որպես հայրենասեր, ընկերասեր և ընտանիքին նվիրված մարդ։

«Շատ լավ տղա էր։ Շատ լավ ընտանիք ունի։ Եթե չեմ սխալվում աղջիկն արդեն ավարտել է դպրոցը, իսկ տղան նոր է բանակից վերադարձել։ Մասնակցել է 44-օրյա պատերազմին»,-ասաց Սամվել Գալստյանը։

Վահան Թաթոսյանը 10 տարուց ավել է, ինչ ծառայում էր։ Նա ևս մասնակցել էր 44-օրյա պատերազմին, բազմաթիվ ռազմական գործողություններ իրականացրել և վիրավորների փրկել։

«Արդեն պատերազմից հետո պատմում էր, որ մի անգամ գործողություն է արել, և վիրավորներին հանելու ժամանակ տպավորություն ստեղծել, որ ինքն էլ է զոհվել»,-նշեց Ջրառատի համայնքապետը։

Չնայած վերջին տարիներին ապրում էր Արարատում, սակայն հաճախ էր այցելում գյուղ՝ տեսնելու ծնողներին և ընկերներին։
«Ամեն ինչին մասնակցում էր։ Ընկերասեր են լինում, որ նաև հայրենասեր են լինում։ Գալիս էր, դուռը բացում ու մտնում, ասում էի՝ էս ի՞նչ կա, ասում էր՝ եկա բարև տամ, գնամ։ Այսպիսի ընկեր էր»,-ընդգծեց Սամվել Գալստյանը։

Մանրամասները՝ սկզբնաղբյուր կայքում