Ռուսական Առաջին ալիքի խմբագիրը ձերբակալվել է

Ռուսական Առաջին ալիքի «Վրեմյա» հաղորդաշարի եթերում աշխատակիցներից մեկը բողոքի ակցիա է իրականացրել։ Նա կանգնել է հեռուստահաղորդավարուհի Եկատերինա Անդրեևայի թիկունքում և բացել հակապատերազմական պաստառ՝ կոչով:

Առաջին ալիքն ստուգում է ուղիղ եթերի ժամանակ տեղի ունեցած միջադեպը, հայտնում է ՏԱՍՍ-ը։

Նախնական տվյալներով՝ Մարինա Օվսյաննիկովան, որը խմբագիր էր, եթերում բողոքի ակցիա է կազմակերպել։ Նրան տարել են Օստանկինոյի ոստիկանական բաժանմունք։

Ենթադրաբար, Առաջին ալիքի աշխատակցի նկատմամբ արձանագրություն է կազմվել Վարչական իրավախախտումների վերաբերյալ օրենսգրքի 20.3.3-րդ հոդվածով՝ զինվորական գրաքննության մասին՝ ՌԴ զինված ուժերը վարկաբեկելու համար։ Փաստաբան Դանիիլ Բերմանը գնացել է Օվսյաննիկովայի մոտ, հայտնում է իրավապաշտպան Պավել Չիկովը։

Առաջին ալիքով հեռարձակման ձայնագրության հասանելիությունը փակ է։ Երբ փորձում եք դիտել հաղորդումը, հայտնվում է մակագրությունը՝ «Հեղինակային իրավունքի սեփականատիրոջ խնդրանքով հեռարձակումից հետո արգելվում է առցանց դիտել»։

Մարինա Օվսյաննիկովան տեսաուղերձում պատմել է իր արարքի դրդապատճառների մասին։

«Այն, ինչ հիմա կատարվում է Ուկրաինայում, հանցագործություն է, իսկ Ռուսաստանը ագրեսոր երկիր է, և այդ ագրեսիայի պատասխանատվությունը միայն մեկ մարդու խղճի վրա է, և այդ մարդը Վլադիմիր Պուտինն է։ Հայրս ուկրաինացի է, մայրս՝ ռուս, և նրանք երբեք թշնամիներ չեն եղել։ Իսկ իմ վզին այս վզնոցը խորհրդանիշն է այն բանի, որ Ռուսաստանը պետք է անհապաղ դադարեցնի եղբայրասպան պատերազմը, և մեր եղբայրական ժողովուրդները դեռ կկարողանան հաշտվել։

Ցավոք, վերջին տարիներին ես աշխատում էի Առաջին ալիքում, անում եմ Կրեմլի քարոզչություն, և հիմա շատ եմ ամաչում դրա համար։ Ես ամաչում եմ, որ ինձ թույլ են տվել հեռուստաէկրաններից սուտ խոսել, ամաչում եմ, որ ինձ թույլ են տվել զոմբիացնել ռուս ժողովրդին։

Մենք լռեցինք 2014 թվականին, երբ այս ամենը նոր էր սկսվում, մենք հանրահավաքների չէինք գնում, երբ Կրեմլը թունավորեց Նավալնիին։ Մենք ուղղակի լուռ նայում էինք այս հակամարդկային ռեժիմին, ու հիմա ամբողջ աշխարհը երես է թեքել մեզանից։ 

Մենք ռուս ժողովուրդ ենք, մտածող և խելացի, մենք պիտի վերջ տանք այս խելագարությանը։ Դուրս եկեք հանրահավաքների, ոչ մի բանից մի վախեցեք, մեզ բոլորիս բանտարկել չեն կարող»։