Լրահոս

Նիկոլ Փաշինյանն իր ընդդիմախոսներին ըստ էության մեղադրել է արտաքին ուժերի հետ մութ գործարքների մեջ մտնելու համար: Հայաստանի վարչապետը գրել է, թե 2018-ից սկսած այդ նույն ուժերը փսփսում էին, թե իր իշխանությունը պատրաստվում է հանձնել հողերը ու երբ գա Արցախի, Հայաստանի շահերը զենքով պաշտպանելու ժամանակը՝ արժանահատավատ հնչի միտքը, թե «հողերը հանձնած են»:

ԱԱԾ-ն տեղեկություններ չունի, թե Արթուր Վանեցյանից բացի, էլ ո՞ր պաշտոնյանն է Նիկոլ Փաշինյանի անունից Ադրբեջանի հետ ուղիղ կապի մեջ եղել: ԱԱԾ նախկին տնօրեն, «Պատիվ ունեմ» խմբակցության ղեկավար Արթուր Վանեցյանը հայտնել էր, որ Երևանի ու Բաքվի միջև օպերատիվ կապն ապահովել է ոչ միայն ինքը, այլև կառավարության աշխատակազմի ևս մեկ պաշտոնյա՝ չգաղտազերծելով նրա անունը:

Երևանում բերման ենթարկված մեկ տասնյակից ավելի քաղաքացիներն ազատ են արձակվել: «Ազատագրական» շարժման մի խումբ անդամներ առավոտյան մտել էին արտաքին գործերի նախարարություն, հանդիպում պահանջել՝ նախարար Արարատ Միրզոյանի հետ: Շարժման մասնակիցներին դիմավորել ու ճանապարհել են ոստիկանները:

«Գերությունից վերադարձած անձինք հոգեբանորեն այնպիսի վիճակում չեն, որ կարողանան ներգրավվել իրավական գործընթացների մեջ», - գերիների ճակատագրի և նրանց իրավունքների շուրջ քննարկմանը ասել է Արցախի ՄԻՊ Գեղամ Ստեփանյանը։ Բաքվից վերադարձած 5 գերիների դեմ Հայաստանում բացված քրեական գործերը կարող են վտանգել մյուս հայ զինծառայողների կյանքը, որոնք դեռ գտնվում են Բաքվում: Կարծում է ՄԻԵԴ-ում հայ ռազմագերիների շահերը ներկայացնող իրավապաշտպանը:

Երևանում այսօր ազատ են արձակել «Հայաստան» խմբակցության 3 պատգամավորի: Մեղրիի նախկին քաղաքապետ Մխիթար Զաքարյանն ու Սիսիանի նախկին քաղաքապետ Արթուր Սարգսյանը դուրս են եկել քրեակատարողական հիմնարկից, պրոֆեսոր Արմեն Չարչյանը ազատ է արձակվել դատարանի դահլիճից:

Վաշինգտոնն ու դաշնակիցները պատրաստվում են վճռական քայլեր ձեռնարկել Մոսկվային պատժելու համար, եթե ռուսական զորքը ներխուժի Ուկրաինա: Միացյալ Նահանգների նախագահին անհանգստացրել է ռուսական զորքի կուտակումը Ուկրաինայի սահմանին:

Դեկտեմբերի 15-ին Բրյուսելում Փաշինյանն Ալիևի հետ հանդիպման կարող է տանել փաստաթուղթ, որ չի բխում Հայաստանի շահերից․ այսպիսի մտահոգություն ունեն «Հայաստան» խմբակցության պատգամավորները: Արդյոք փաստաթղթում լինելո՞ւ է հիշատակում, որ Արցախի հարցով զբաղվելու է Մինսկի խումբը: ՔՊ-ականները ուղիղ չեն պատասխանել հարցին, հայտարարելով, որ դա պետական գաղտնիք է:

Իշխան Զաքարյանը դուրս է եկել «Պատիվ ունեմ» խմբակցությունից և գործելու է որպես անկախ պատգամավոր: Զաքարյանը ԱԺ այսօրվա նիստին չի մասնակցել, հետո հայտարարություն է տարածել՝ վստահեցրել, թե ընդդիմադիր դաշտում է գործելու։

Այսօր կեսօրից հետո ադրբեջանական զինուժը Գեղարքունիքի ուղղությամբ հարձակվել է հայկական դիրքերի վրա: Թշնամու գնդակից 19-ամյա շարքային է զոհվել: 8 զինծառայող վիրավոր է: Նրանցից 6-ի վիճակը ծանր է: Պաշտպանության նախարարությունը հայտնում է, որ հայկական կողմի պատասխան գործողությունների արդյունքում հակառակորդը, կորուստներ տալով հետ է շպրտվել։ Իրավիճակը գտնվում է մեր զինուժի վերահսկողության տակ։

ՔՊ-ական պատգամավորն այսօր հայտարարել է, որ դիրքերում ձմեռը անցկացնելու համար առավելագույն պայմաններ կան: Ռուստամ Բաքոյանն ասում է եղել է դիրքերում ու տեսել, որ լավ էլ կահավորված են դրանք:

Կապանը մարզաառողջարանային համալիր կունենա: Շենքի շինարարությունը սկսվել է 2020 թվականի մայիսին:

«Հայաստան» դաշինքի անդամներ Նարեկ Մանթաշյանն ու Գերասիմ Վարդանյանը հրավիրվել են Ազգային անվտանգության ծառայություն: Ըստ Մանթաշյանի՝ զավեշտալի մեղադրանք է առաջադրվել իրեն, իբր դրոշ է գողացել: Ի տարբերություն Մանթաշյանի՝ Գերասիմ Վարդանյանն, ԱԱԾ-ում այսօր ցուցմունք չի տվել:

Արցախում ռուս խաղաղապահների նախկին հրամանատար Ռուստամ Մուրադովը խոստացել ավարտին հասցնել հայ ռազմագերիներին վերադարձնելու գործը: Ռուսական «Տասս» գործակալության հետ հարցազրույցում Մուրադովն ասել է, որ կա դրական առաջընթաց, կա ըմբռնում:

Բունդեսթագում երկար ծափահարություններով ու հոտնկայս ճանապարհել են 16 տարի պաշտոնավարած կանցլեր Անգելա Մերկելին: Գերմանիայի «Երկաթե Լեդին» մեծ քաղաքականությունից հեռանալուց հետո ուզում է շատ ճամփորդել ու կարդալ: Արդեն հայտնի է Գերմանիայի նոր կանցլերի անունը: 63-ամյա Օլաֆ Շոլցը Գերմանիայի սոցիալ-դեմոկրատական կուսակցության ղեկավարն է, նա այսօր երդվել է:

Թշնամու կրակոցների տակ է Հայաստանը Ադրբեջանի և Թուրքիայի հետ բանակցություններ սկսում: «3+3» ֆորմատով բանակցություններ սկսելու՝ Թուրքիայի նախագահի առաջարկը միս ու արյուն է ստանում: Այս նոր հարթակում Հայաստանի ու Ադրբեջանի և Ռուսաստանի, Թուրքիայի և Իրանի փոխարտգործնախարարների առաջին հավաքը սպասվում է վաղը Մոսկվայում:

Խորհրդարանը մերժել է ծանր վիրավորանք հասցնելն ու զրպարտելը ապաքրեականացնելու ընդդիմության առաջարկը:

Ռուսաստանի նախագահ Վլադիմիր Պուտինը հայտարարել է, որ իրենց երկրի անվտանգության համար այսօր սպառնալիք է ՆԱՏՕ-ն ու նրա տարածվելը դեպի Ուկրաինա:

Այսօր հայ-ադրբեջանական սահմանի արևելյան ուղղությամբ ադրբեջանական կրակոցներից 2 զինծառայող է վիրավորվել: Պաշտպանության նախարարությունը հայտնում է, որ զինվորները թեթև են վիրավորվել: Վերին Շորժայի գյուղապետն ու Գեղամասարի համայնքապետը «Հայլուրին» հայտնել են, որ ադրբեջանցիները երեկ գիշերվանից են կրակում գյուղերի ուղղությամբ՝ թիրախավորելով խաղաղ բնակչությանը:

Տաթև-Աղվանի նորակառույց այլընտրանքային ճանապարհի մի քանի հատված քանդվել է: Կադրերը ֆիքսել են «Հայլուրի» թղթակիցները: