Լրահոս

«Ալ-Հիլալը» վստահ է Լիոնել Մեսսիի տրանսֆերի հարցում. Սաուդյան Արաբիայի ակումբն ամեն ինչ պատրաստել է տրանսֆերի համար, Մեսսիին առաջարկվում է մինչև 600 միլիոն եվրո մեկ մրցաշրջանում։ «Ալ-Հիլալում» գրեթե համոզված են, որ Լեոն կտեղափոխվի, բայց քանի դեռ արգենտինացին պայմանագիր չի ստորագրել, նրանք չեն ցանկանում գործարքը վերջնականապես փակված համարել, ArmSport.am-ի փոխանցմամբ՝ հայտնում է Mundo Deportivo-ն: Մեսսիին հավակնում է նաև «Ինտեր Մայամին»-ն։ Մեսսին լրջորեն դիտարկում է MLS ներկայացնող ակումբի առաջարկը: Մեսսին կարող է վերադառնալ նաև «Բարսելոնա», սակայն ըստ աղբյուրի՝ կատալոնական ակումբ վերադարձն արդեն այդքան էլ հավանական չի թվում։ Հիշեցնենք, որ ավելի վաղ հայտնի էր դարձել ՊՍԺ-ից Մեսսիի հեռանալու մասին։

Ադրբեջանի ՊՆ հաղորդագրությունն այն մասին, թե իբր հունիսի 4-ին` ժամը 18:25-ին, ՀՀ ԶՈՒ ստորաբաժանումները կրակ են բացել սահմանագոտու արևելյան հատվածում տեղակայված ադրբեջանական դիրքերի ուղղությամբ, հերթական ապատեղեկատվությունն է:

Հունիսի 4-ին, ժամը 15:21-ին Ճգնաժամային կառավարման ազգային կենտրոն ահազանգ է ստացվել, որ Երևանի Տիգրան Մեծի պողոտայի շենքերից մեկի անձրևատար խողովակը թուլացել և կախվել է, առկա է ընկնելու վտանգ․ անհրաժեշտ է փրկարարների օգնությունը։ Այս մասին հայտնել է ՀՀ ներքին գործերի նախարարության փրկարար ծառայությունը։ «Դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ և Փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը: Փրկարարներն ապամոնտաժել են թուլացած անձրևատար խողովակը (մոտ 2 մ)»,- ասված է հաղորդագրության մեջ։

ԱԽ քարտուղար Արմեն Գրիգորյանը հավանական է համարում Ադրբեջանի հետ խաղաղության համաձայնագրի ստորագրումը մինչև 2023 թվականի ավարտը: «Հայաստանի և Ադրբեջանի միջև շատ ինտենսիվ բանակցություններ են ընթանում։ Եթե այդ ինտենսիվությունը պահպանվի և լինի միջազգային հանրության ուժեղ աջակցությունը, ապա հնարավորություն կա մինչև տարեվերջ ստորագրել խաղաղության համաձայնագիրը։ Մենք տրամադրված ենք հնարավորինս արագ ստորագրել համաձայնագիրը», — Հանրային հեռուստաընկերության եթերում հայտարարել է Գրիգորյանը։

ՀՀ պետական հանրակրթական դպրոցներում առաջին դասարանցիների հայտագրման գործընթացը կմեկնարկի հունիսի 12-ից և կիրականացվի 3 փուլով, հաղորդում է ԿԳՄՍ նախարարությունը։ Այս տարի ևս հայտագրման գործընթացն իրականացվելու է նախարարության «Կրթական տեխնոլոգիաների ազգային կենտրոն» ՊՈԱԿ-ի կողմից վարվող «Սովորողներին դպրոց հայտագրելու էլեկտրոնային համակարգի» միջոցով։ Առաջին փուլով՝ հունիսի 12-ից հայտագրումը բաց կլինի բոլոր այն քաղաքացիների համար, որոնք ունեն որոշակի արտոնություններ։

Արցախի Մարտունու շրջանում արձանագրվել է հրադադարի մեկ խախտում, տուժածներ չկան։ Այս մասին հայտնել է ՌԴ պաշտպանության նախարարությունը խաղաղապահ առաքելության գործունեության մասին տեղեկագրում։ «Ռուսական խաղաղապահ զորախմբի հրամանատարությունն ադրբեջանական և հայկական կողմերի հետ հետաքննություն է անցկացնում այս փաստի առնչությամբ։ Մարտակերտի, Մարտունու և Շուշիի շրջաններում պարեկություն է իրականացվել երեք երթուղիներով։ Ռուս խաղաղապահները մեքենաների ճանապարհով Ստեփանակերտ են հասցրել 301 տոննա մարդասիրական օգնություն»,- ասված է հաղորդագրույթան մեջ։

Հունիսի 4-ին, ժամը 17։01-ին Լոռու մարզային փրկարարական վարչության ճգնաժամային կառավարման կենտրոն ահազանգ է ստացվել, որ «Ստեփանավանի Սոճուտ Դենդրոպարկ»-ի մոտակայքում ավտոբուսն արգելափակվել է ցեխակույտում․ անհրաժեշտ է փրկարարների օգնությունը։ Այս մասին հայտնել է ՀՀ ներքին գործերի նախարարության փրկարար ծառայությունը։ «Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։ Փրկարարներն արգելափակումից դուրս են բերել ավտոբուսը (վարորդ՝ Վ․ Ե․, 40 ուղևոր, որից 20-ը երեխա)»,- ասված է հաղորդագրության մեջ։

Կանաչ սոխն անհրաժեշտ է օգտագործել հոգեկան սթրեսի ավելացման դեպքում, այն ամրապնդում է ուղեղի ակտիվ գործունեությունը: Այս մասին խոսել է գաստրոէնտերոլոգ, Սանկտ Պետերբուրգի SM-Clinic-ի թերապևտ Ալեքսանդրա Յակովլևան։ Բժշկի խոսքով՝ սննդանյութերի պարունակությամբ կանաչ սոխը գերազանցում է գլուխ սոխին։ Բանջարեղենն ունի մեծ քանակության կալիում, որն օգնում է օրգանիզմից հեռացնել ավելորդ հեղուկը և այտուցը։ «Կալիումը նաև մասնակցում է նյարդային ազդակների փոխանցմանը և ուղեղի թթվածնով հագեցվածությանը: Այսպիսով, օգտակար է կանաչ սոխ ուտել սթրեսի դեպքում, դա կօգնի բարձրացնել ուղեղի ակտիվությունը», – ասել է Յակովլևան Gazeta.Ru-ին տված հարցազրույցում: Գաստրոէնտերոլոգը նշել է, որ այն օգտակար է հղիների համար։ Պարունակում է մեծ քանակության ֆոլաթթու, որը նպաստում է երեխայի ճիշտ զարգացմանը, ինչպես նաև նվազեցնում է վաղաժամ ծննդաբերության և բնածին հիվանդությունների զարգացման ռիսկը։ Բացի դրանից, կանաչ սոխը օգնում է վերականգնել ատամի էմալը, վերացնում է միկրոճաքերը և պայքարում սպիտակ բծերի դեմ, որոնք վկայում են բերանի խոռոչում այնպիսի հիվանդության առաջացման մասին, ինչպիսին կարիեսն է, նշել է Յակովլևան։ Բժիշկը հավելեց, որ բանջարեղենը պարունակում է վիտամին A, որն օգուտ է աչքի եղջերաթաղանթին և պահպանում է տեսողությունը։

Էջմիածնի հյուրանոցներից մեկում հայտնաբերվել է հրազենային վնասվածքով տղամարդու դի: Այս մասին հայտնում է Shamshyan. com-ը: Պարզվել է, որ մահացածը Վաղարշապատ քաղաքի բնակիչ, 38-ամյա Սերժիկ Ղ․-ն է։ Դեպքի վայրում հայտնաբերվել են նաև «ТТ» տիպի ատրճանակ և մեկ հատ կրակված պարկուճ։ Shamshyan. com-ի տեղեկություններով` տեղի ունեցածը ինքնասպանություն է, իսկ մահացածը նախկինում եղել է մի քանի անգամ դատապարտված։

Շղթայական ավտովթար է տեղի ունեցել Երևանում։ Այս մասին գրել է Shamshyan.com-ը։ Այսօր ժամը 13։00-ի սահմաններում Պարույր Սևակի փողոցում, ՀՀ քննչական կոմիտեի Երևան քաղաքի քննչական վարչության հարևանությամբ բախվել են Mercedes, Hyundai, Mazda և Hyundai Elantra մակնիշի ավտոմեքենաները։ Վթարի հետևանքով 1 հոգի, ում առաջինն օգնության են հասել քաղաքացիներն ու օպերատիվորեն ժամանած շտապօգնության բժիշկների հերթապահ խումբը, տեղափոխվել է թիվ 8-րդ բժշկական կենտրոն։ Բժիշկները վիրավորին մինչև հիվանդանոց տեղափոխելը, տեղում առաջին բուժօգնությունն են ցուցաբերել։ Օպերատիվորեն ժամանել են ՀՀ Ներքին գործերի նախարարության Ոստիկանության Պարեկային ծառայության Երևան քաղաքի գնդի 3-րդ գումարտակի 2-րդ վաշտի պարեկները։ Վթարի մասին ՊԾ Երևան քաղաքի գնդից տեղեկությունը փոխանցել են Հայաստանի քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժին, որտեղից ժամանել է քննչական խումբը։ Վթարի փաստով՝ Գ․ Սարգսյանի կողմից նախաձեռնվել է վարույթ։ Վթարված ավտոմեքենաներից Hyundai Elantra-ն ու Mazda-ն եղել են ճանապարհի թույլատրելի հատվածում կայանված։

Երեկ՝ հունիսի 3-ին Երևանի «Սուրբ Աստվածամայր» բժշկական կենտրոնի վերակենդանացման բաժանմունքում, գիտակցության չգալով, մահացել է Արարատի մարզի բնակիչ 8-ամյա Սարգիս Օ․-ն, հաղորդում է Shamshyan.com-ը։ Վերջինս նշված բժշկական կենտրոն էր տեղափոխվել մայիսի 27-ին Արտաշատ-Գառնի ավտոճանապարհին տեղի ունեցած ողբերգական ավտովթարի հետևանքով ստացած մարմնական վնասվածքներով։ Աղբյուրի տեղեկություններով՝ երեկ բժշկական կենտրոնում մահացած Սարգիս Օ․-ն VAZ 2106 մակնիշի ավտոմեքենայի վարորդ, տեղում մահացած, Արարատի մարզի բնակիչ 38-ամյա Արտյոմ Օրդյանի որդին էր։ Ինչպես ավելի վաղ հայտնել էինք, հունիսի 1-ին, հիվանդանոցում մահացել է Արարատի մարզի բնակիչ, 12-ամյա Ռոբերտ Ա.-ն։ Վերջինս հիվանդանոց էր տեղափոխվել մայիսի 27-ին Գառնի-Արտաշատ ավտոճանապարհին տեղի ունեցած 06-ի և Volkswagen-ի բախման հետևանքով ողբերգական ավտովթարից հետո։ Տեղում մահացել էր 06-ի վարորդը, իսկ 7 հոգի, որոնց թվում նաև Ռոբերտ Ա․-ն, տեղափոխվել էին հիվանդանոց։ Ըստ նախնական տվյալների՝ «Վազ 2106» ավտոմեքենայով ըմբշամարտի 2 մարզիչները երեխաների հետ մեկնելիս են եղել Գառնի՝ ըմբշամարտի մրցումների մասնակցելու նպատակով։ Դեպքի առնչությամբ նշանակվել են դատաբժշկական փորձաքննություններ: Կա նախաձեռնված քրեական վարույթ՝ ՀՀ ՔՕ 342-րդ հոդվածի (ճանապարհային երթեւեկության անվտանգության ապահովմանն ուղղված պահանջները կամ ճանապարհային երթեւեկության կամ տրանսպորտային միջոցների շահագործման անվտանգությունն ապահովող կանոնները խախտելը) հատկանիշներով:

Հունիսի 3-ին Բելգիայի 47-ամյա վարչապետ Ալեքսանդր դե Կրոն Բրաքելում գտնվող իր տան մոտ ընկել է հեծանիվից և հարվածել է գլուխը, որից հետո կորցրել է գիտակցությունը։ Նրան տեղափոխել են հիվանդանոց, որտեղ հետազոտել են, հայտնում է RTBF-ն: Նշվում է, որ երեկոյան Ալեքսանդր Դե Կրոն տուն կվերադառնա։

ԱՀ քննչական կոմիտեի տարածքային քննչական վարչության Մարտակերտի շրջանի քննչական բաժնում հարուցվել և վարույթ է ընդունվել 2023թ. հունիսի 04-ին՝ ժամը 07:30-ի սահմաններում, ԱՀ Մարտակերտ քաղաքի Սարալանջ հասցեի 1991թ. ծնված Արմեն Բորիկի Ավետիսյանի կողմից նույն հասցեում գտնվող իրեն պատկանող առանձնատան հարակից այգում ծառից պարանով կախվելու եղանակով ինքնասպանություն գործելու դեպքի առթիվ ԱՀ քրեական օրենսգրքի 109-րդ հոդվածի 1-ին մասով հարուցված քրեական գործը: Հայտնում են ԱՀ Քննչական կոմիտեից: Արցախի Քննչական կոմիտեի տեղեկացմամբ՝ դեպքի վայր է մեկնել ԱՀ քննչական կոմիտեի տարածքային քննչական վարչության Մարտակերտի շրջանի քննչական բաժնի պետի տեղակալ Կ. Ադամյանի գլխավորությամբ օպերատիվ խումբ: Կատարվում են համապատասխան քննչական և դատավարական գործողություններ դեպքի հանգամանքները պարզելու համար: Նախաքննությունը շարունակվում է:

Չինական «Շենչժոու-16» տիեզերանավի գործարկումից հետո տիեզերքում միաժամանակ գտնվող մարդկանց թիվը հասել է 17-ի, ինչը համարվում է ռեկորդ։ Նախորդ ռեկորդը սահմանվել է 2021թ սեպտեմբերի 16-ին, երբ տիեզերքում միաժամանակ գտնվել էր 14 մարդ։ Չինական տիեզերանավը տիեզերք է դուրս եկել մայիսի 30-ին։ Բացի դրանից, միջազգային տիեզերակայանում է գտնվում ռուսական «Սոյուզ МС-23», ամերիկյան «Crew Dragon» և մասնավոր ընկերության պատկանող «AxiSpace AX-2» տիեզերանավերը։

Գերմանիայի ռազմածովային ուժերը հաջորդ տարի Հնդկա-խաղաղօվկիանոսյան տարածաշրջան երկու ռազմանավ կուղարկեն, Սինգապուրում անվտանգության հարցերով «Շանգրի-Լա երկխոսություն» ֆորումի ժամանակ հայտնել է երկրի պաշտպանության նախարար Բորիս Պիստորիուսը: Այս մասին, ինչպես հաղորդում է «Արմենպրես»-ը, հայտնում է «ՌԻԱ Նովոստի»-ն: Պիստորիուսի խոսքով, որը փոխանցում է N-tv հեռուստաալիքը, 2024 թվականին Հնդկա-խաղաղօվկիանոսյան տարածաշրջան կուղարկվի մեկ ֆրեգատ, ինչպես նաեւ մատակարարման նավ: «Դա կծառայի միջազգային կարգի պաշտպանությանը, որը հիմնված է այն կանոնների վրա, որոնք մենք բոլորս ստորագրել ենք եւ որոնցից բոլորը պետք է օգուտ քաղեն», - ընդգծել է Գերմանիայի պաշտպանության նախարարը: Պիստորիուսը նաև հայտարարել է, որ այդ քայլն ուղղված չէ կոնկրետ երկրների դեմ։

Կիրակի օրը Ստամբուլում ավարտվել են Թուրքիայի նախագահ Ռեջեփ Թայիփ Էրդողանի և ՆԱՏՕ-ի գլխավոր քարտուղար Յենս Ստոլտենբերգի բանակցությունները։ Ինչպես լրագրողներին հայտնել են Թուրքիայի նախագահի գրասենյակից, դրանք տևել են մոտ մեկուկես ժամ։ Արդյունքների մասին մամուլի համար հայտարարություններ չեն լինի։ Բանակցությունների հիմնական թեման եղել է Շվեդիայի՝ ՆԱՏՕ-ին անդամակցելու գործընթացը։ անդիպմանը մասնակցել են Թուրքիայի նորանշանակ արտգործնախարար Հաքան Ֆիդանը, ազգային պաշտպանության նախարար Յաշար Գյուլերը և Թուրքիայի նախագահի նախկին մամուլի քարտուղար Իբրահիմ Քալընը։ Վերջինս, ըստ թուրքական լրատվամիջոցների, մոտ ժամանակներս կարող է նշանակվել հետախուզության ղեկավարի պաշտոնում։ Թուրքիան շարունակում է արգելափակել Շվեդիայի մուտքը ՆԱՏՕ՝ մասնավորապես պահանջելով արտահանձնել ահաբեկչության մեջ մեղադրվող քուրդ ակտիվիստներին, ովքեր քաղաքական ապաստան են ստացել այս երկրում։ Ի պատասխան՝ Ստոկհոլմը պնդում է, որ իրենք կատարել են Անկարայի բոլոր պայմանները՝ Շվեդիայի՝ ՆԱՏՕ-ին անդամակցության ճանապարհին, իսկ կոնկրետ անձանց Թուրքիա արտահանձնելու հարցը պետք է որոշի միայն շվեդական դատարանը, այդ հարցը դուրս է կառավարության իրավասությունից։

Հնդկաստանի Օդիշա նահանգում երեք գնացքների բախման պատճառ է դարձել էլեկտրոնային արգելափակման համակարգի խափանումը, NDTV հեռուստաալիքի եթերում հայտարարել է երկրի երկաթուղիների նախարար Աշվինի Վայշնավը: Այս մասին տեղեկացնում է «Արմենպրես»-ը՝ հղում անելով «ՌԻԱ Նովոստի»-ին: «Խոսքը էլեկտրոնային արգելափակման մասին է։ Փոփոխությունը, որը տեղի է ունեցել էլեկտրոնային արգելափակման ժամանակ, դրա պատճառով էլ տեղի է ունեցել վթարը: Թե ով է դա արել և ինչպես է դա տեղի ունեցել, կպարզվի պատշաճ քննությունից հետո»,- ասել է նա։ Հնդկաստանի Բալասոր քաղաքից ոչ հեռու ուրբաթ երեկոյան բախվել են երեք՝ երկու մարդատար և 1 բեռնատար գնացք: Կալկաթայից Չենայ ուղևորվող ուղևորատար գնացքի մի քանի վագոններ դուրս են եկել ռելսերից բեռնատար գնացքի հետ բախման պատճառով և ընկել երկաթուղու հակառակ գծին: Որոշ ժամանակ անց նրանց է բախվել ևս մեկ ուղևորատար գնացք, ինչի հետևանքով ռելսերից դուրս են եկել մարդկանց տեղափոխող ևս մի քանի վագոններ: Վերջին տվյալներով՝ արտակարգ պատահարի հետևանքով զոհվել է 288 մարդ, վիրավորվել՝ ավելի քան 900-ը:

Ավարտվեց Հայաստանի կանանց 2023թ. առաջնության կիսաեզրափակիչ մրցաշարը: Շախմատի ֆեդերացիան ներկայացնում է լավագույն եռյակը․ Լիլիթ Կասինյան՝ 7.5 միավոր Լիլիա Դանիելյան՝ 7 միավոր Մելինե Հարությունյան՝ 6.5 միավոր Մրցաշարում 1-10-րդ տեղերը զբաղեցրած շախմատիստուհիները իրավունք են ստացել մասնակցելու Հայաստանի կանանց 2023թ. առաջնության առաջին խմբի մրցաշարին:

Ոստիկանության Եղեգնաձորի բաժնի քրեական հետախույզները, իրացնելով օպերատիվ տվյալները, հունիսի 2-ին Երևան քաղաքի Է. Հասրաթյան փողոցում հայտնաբերել և ՀԿԳ քննության գլխավոր վարչություն են ներկայացրել 31-ամյա Մարիամ Հ.-ին: Նա հետախուզվում էր ՀՀ քրեական օրենսգրքի 476-րդ հոդվածի (Սուտ մատնությունը) 2-րդ մասի մեղադրանքով: : Հայտնում են ոստիկանությունից: Խափանման միջոցը՝ բացակայելու արգելք:

ԱԺ «Հայաստան» խմբակցության պատգամավոր Քրիստիեն Վարդանյանը գրում է. «Հակոբ Բերբերյանին «Նիկոլ դավաճան» գոռալու համար բերման են ենթարկել Կենտրոնի ոստիկանական բաժին: Ես և Ասպրամ Կրպեյանը գնում ենք այնտեղ»։