Լրահոս

Ռուսաստանի նախագահ Վլադիմիր Պուտինը նախարարների կաբինետին հանձնարարել է անել ամեն ինչ՝ Սև ծովում լցանավերի խորտակման հետևանքով նավթամթերքի արտահոսքը կանխելու և լցանավերը բարձրացնելու ծրագրեր մշակելու համար։ «Արմենպրես»-ի փոխանցմամբ՝ այս մասին հայտնում է «ՌԻԱ Նովոստի»–ն: «Ամեն ինչ պետք է արվի, որպեսզի լուծվի խորտակված լցանավերից նավթամթերքի արտահոսքը դադարեցնելու հարցը: Պետք է արդեն մտածել և մշակել խորտակված լցանավերի բարձրացման ծրագրեր»,- ասել է Պուտինը։ Նրա խոսքով՝ լցանավերը բարձրացնելն առանձին լայնածավալ աշխատանք է, որը կապված է համապատասխան մասնագետների պատրաստման և նախապես անհրաժեշտ սարքավորումների ու ֆինանսական ռեսուրսների տրամադրման հետ: Ռուսաստանի Դաշնության Կրասնոդարի շրջանի սևծովյան ափամերձ հատվածում Կերչի նեղուցում լցանավերի վթարը տեղի է ունեցել 2024–ի դեկտեմբերին, լցանավերից մազութի արտահոսք է սկսվել:

«Հայաստանի էլեկտրական ցանցեր» ընկերությունը նաև տեղեկացնում է, որ պետական «Բարձրավոլտ էլեկտրական ցանցեր» ընկերությանը պատկանող Զովունի 220/110/10 կՎ ենթակայանում իրականացվող աշխատանքներով պայմանավորված հնարավոր են էլեկտրամատակարարման ընդհատումներ Երևանի Դավթաշեն վարչական շրջանում և Զովունի գյուղում:

Հայաստանի նախկին արտգործնախարար, Արցախի հարցերով հանձնախմբի համակարգող Վարդան Օսկանյանը հրապարակել է «Փաշինյանի ղեկավարությունը՝ Հայաստանի անկման կատալիզատոր» վերտառությամբ անգլերեն հոդվածը, որը թարգմանությամբ ներկայացնում ենք ստորև. «2025թ. սկսել է և Հայաստանը կրիտիկական խաչմերուկում է՝ բախվելով արտաքին քաղաքական խորը մարտահրավերների և իր ապագայի վերաբերյալ գոյաբանական հարցերի: Ազգը հայտնվել է դաժան երկակիության մեջ՝ Ադրբեջանի կողմից աճող արտաքին սպառնալիքներ և ներքին կաթված, որը նշանավորվում է ինքն իրեն հանգստացնելով, հեռատեսության տագնապալի բացակայությամբ և վտանգավոր պասիվ կեցվածքով: Արտաքին և ներքին ճգնաժամերի այս սերտաճումն ընդգծում է հստակության, ռազմավարության և խիզախ ղեկավարության հրատապ անհրաժեշտությունը՝ երկիրը ներկայիս ճահճից դուրս բերելու համար: Ադրբեջանը ստվեր է գցում Հայաստանի արտաքին քաղաքականության վրա. 2020 թվականին Լեռնային Ղարաբաղի պատերազմում (Հայաստանի) կրած ռազմական պարտությունը և 2023 թվականին Ադրբեջանի կողմից տարածաշրջանի լիակատար գրավումը վերափոխել են Հարավային Կովկասում իշխանության դինամիկան։ Դիվանագիտական մանևրների և տնտեսական ազդեցության լծակներով՝ Բաքուն հաջողությամբ տարածել է Հայաստանը որպես տարածաշրջանային սպառնալիք, ագրեսոր և նույնիսկ «ֆաշիստական պետություն» ներկայացնող նարատիվ: Անհանգստացնող է, որ Հայաստանի ղեկավարությունը չի կարողացել արդյունավետ կերպով հակազդել այս նարատիվին, նույնիսկ այն դեպքում, երբ Ադրբեջանը կատարում է աղաղակող գործողություններ՝ Լեռնային Ղարաբաղի օկուպացիան ու էթնիկ զտումը, տարածքային ներխուժումը Հայաստան, Հայաստանի քաղաքացիների պատանդառումը և հայկական մշակութային ժառանգության ոչնչացումը։ Ադրբեջանի պահանջներն էլ ավելի են բացահայտում Հայաստանի խոցելիությունը և նրա հակառակորդի՝ գնալով մեծացող հավակնությունները։ Այդ պահանջները ներառում են Հայաստանի զինված ուժերի զինաթափումը, 300,000 ադրբեջանցիների վերաբնակեցումը Հայաստանում, Ադրբեջանը Նախիջևանի էքսկլավին կապող միջանցքի ստեղծումը, Մինսկի խմբի կազմաքանդումը և նույնիսկ սահմանադրական փոփոխություններ Հայաստանում: Նման պայմանները գոյաբանական սպառնալիքներ են ներկայացնում Հայաստանի ինքնիշխանության և ինքնության համար, սակայն Հայաստանի կառավարությունը քիչ բան է անում այս ամենին դիմակայելու կամ արձագանքելու համար համահունչ ռազմավարության առումով: Ադրբեջանի ճնշումների առաջ ընկրկումն արտացոլում է Հայաստանի իշխանությունների ավելի լայն ձախողումը. հեռատեսության բացակայություն, Ադրբեջանի քայլերը կանխատեսելու անկարողություն և իմաստալից դաշինքներ կառուցելու կամ ազգային վստահություն ներշնչելու անհանգստացնող անկարողություն: Հայաստանի արտաքին քաղաքականության մեջ տիրող խառնաշփոթն աննախադեպ է. Փաշինյանի արտաքին քաղաքական նախաձեռնություններն ավելի շատ վերաբերում են քաղաքական թատրոնին, քան բովանդակությանը, որի նպատակն էր հանրությանը շեղել և մանիպուլացնել կեղծ հույսով և անիրատեսական ակնկալիքներով։ Օրինակ, կառավարության այսօրվա հավանությունը ԵՄ-ին Հայաստանի անդամակցության գործընթացը նախաձեռնող օրենքի նախագծին ամբողջությամբ կտրված է ԵՄ բուն օրակարգից։ Նմանապես, Միացյալ Նահանգների հետ մոտալուտ «ռազմավարական համագործակցության» համաձայնագրի վերաբերյալ վերջին հայտարարությունը խաթարվել է ԱՄՆ Պետդեպարտամենտի՝ նման զարգացումների վերաբերյալ ակնհայտ անտեղյակության պատճառով: Փաշինյանի կողմից Հայաստանը որպես «խաղաղության խաչմերուկ» պատկերելը նույնպես դատարկ բան է. տարածաշրջանային հաղորդակցության միջանցքներն արդեն իսկ նախագծվել և վերջնական տեսքի են բերվել՝ ամբողջությամբ շրջանցելով Հայաստանը։ Հայաստանի արտաքին քաղաքական մարտահրավերները կարելի է դասակարգել երեք առանձին շերտերի. Առաջինը ներքին դիսֆունկցիան է, որը մարմնավորում է Փաշինյանի վարչակազմը, որի օրոք ունեցել ենք զգալի կորուստներ, լարված դաշինքները և միջազգային վարկանիշի անկումը։ Երկրորդն Ադրբեջանից բխող ուղղակի սպառնալիքն է: Երրորդը տարածաշրջանային և գլոբալ դինամիկայի բարդ փոխազդեցությունն է, որը պահանջում է ճկունություն և հարմարվողականություն. հատկանիշներ, որոնք ակնհայտորեն բացակայում են ներկայիս ղեկավարության մեջ: Փաշինյանի պաշտոնավարման հատկապես բացահայտ ձախողումը եղել է կրիտիկական նշանակություն ունեցող բանակցությունների ընթացքում Հայաստանի օգտին օրակարգի վրա ազդելու, առավել ևս օրակարգ թելադրելու անկարողությունը։ Թեև ոչ մի առաջնորդից չի ակնկալվում, որ միակողմանիորեն վերահսկի քննարկումները, սակայն նարատիվը ձևավորելու ջանքերի իսպառ բացակայությունը բացահայտում է կոմպետենցիայի և ռազմավարական տեսլականի գոյություն չունենալը, ինչն անհանգստացնող է: 44-օրյա պատերազմի ավարտից հետո Հայաստանը մնացել է պաշտպանվողի դիրքում՝ արձագանքելով իրադարձություններին՝ իր առաջնահերթություններն ակտիվ սահմանելու փոխարեն։ Լեռնային Ղարաբաղի, տարածքային ամբողջականության, սահմանների սահմանագծման և անվտանգության երաշխիքների վերաբերյալ քննարկումները մեծամասամբ շեղվել են ընդդեմ հայկական շահերի՝ ազգին մանևրելու քիչ տեղ թողնելով: Կար ժամանակ, երբ Հայաստանի դիվանագիտությունը հարգանք էր վայելում և շոշափելի արդյունքներ տալիս։ Դաշնակիցները վճռական էին իրենց աջակցության հարցում, և անգամ թշնամիներն ընդունում էին Հայաստանի դիրքորոշումը: Այսօր, այդ ժամանակաշրջանը թվում է հեռավոր հուշ: Երկրի արտաքին քաղաքականությունն այժմ հիշեցնում է փոթորկի մեջ հայտնված անղեկ նավ՝ անվճռականությունից կաթվածահար եղած ղեկավարությամբ: Այս անկարողությունը հանգեցրել է Հայաստանի վարկանիշի նվազմանը, ինչը երկիրը խոցելի է դարձնում ճգնաժամերի անողոք շրջափուլի նկատմամբ, իսկ ներկայիս վարչակազմը կարծես թե ի վիճակի չէ այդ ճգնաժամերը լուծել: Այս մռայլ պատկերը բարդանում է համաշխարհային և տարածաշրջանային հիմնական դերակատարների շրջանում Հայաստանի ղեկավարության նկատմամբ վստահության քայքայմամբ։ Ռուսաստանը և Իրանը խորը թերահավատություն ունեն Փաշինյանի նկատմամբ, Թուրքիան մնում է թերահավատ, իսկ Ադրբեջանը՝ բացահայտ անտագոնիստ, և նույնիսկ Արևմուտքի ներգրավվածությունը գործարքային է թվում, քան իրական: Հայաստանին ամենից առաջ պետք է խոհեմ, գրագետ, խիզախ և ռացիոնալ առաջնորդություն։ Ներկայիս վարչակազմն ապացուցել է, որ ի վիճակի չէ բավարարել այդ պահանջները։ Ազգը պետք է թոթափի իր կաթվածը և դուրս գա պատերազմի հավերժական վախից: Հայաստանն առաջնորդող սկզբունքը պետք է լինի նրա ազգային շահը՝ սահմանված ոչ թե հանձնվելով, այլ ռազմավարական ճշգրտմամբ։ Միջազգային քաղաքականությունը, ի վերջո, դիվանագիտության միջոցով հակասող շահերի հաշտեցումն է, այլ ոչ թե անխուսափելի փոխզիջումները կամ պատերազմը: Հայաստանը պետք է վերադասավորի իր աշխարհաքաղաքական ռազմավարությունը՝ նորացնելով դաշինքները՝ հիմնված նոր ըմբռնումների վրա՝ միաժամանակ ընդլայնելով գործընկերությունը համաշխարհային ուժային կենտրոնների հետ։ Այս մոտեցումը պահանջում է նուրբ հավասարակշռություն տարածաշրջանային նոր իրողություններին հարմարվելու և Հայաստանի հիմնարար իրավունքների, ինքնության և պետականության պահպանման միջև։ Նման ռազմավարությունը միայն գոյատևման մասին չէ, այլ դիրքերը վերականգնելու և Հայաստանի ապագան ձևավորելու մասին», - գրել է Օսկանյանը:

ՆԳՆ նախաձեռնած օրենսդրական կարգավորումներով կանոնակարգվում է անհատական շարժունակության (տեղաշարժման) միջոցներով (էլեկտրական սկուտեր, էլեկտրական սքեյթբորդ, գիրոսկուտեր, սեգվեյ, միանիվ և այլ նմանատիպ միջոցներ) երթևեկությունը։ Այս մասին հայտնում են ՀՀ ՆԳ նախարարությունից։ Օրենսդրական կարգավորումների հիմնական նպատակը ՀՀ-ում այս ոլորտում միջազգային փորձին համահունչ նոր մշակույթի ձևավորումն է։ Ըստ կարգավորման՝ անհատական շարժունակության (տեղաշարժման) միջոցը մեկ կամ մի քանի անիվ (գլանափող) ունեցող տրանսպորտային միջոց է, որը նախատեսված է էլեկտրական շարժիչի օգտագործմամբ մարդու անհատական տեղաշարժման համար (էլեկտրական սկուտեր, էլեկտրական սքեյթբորդ, գիրոսկուտեր, սեգվեյ, միանիվ և այլ նմանատիպ միջոցներ), անհատական շարժունակության միջոց վարելու իրավունք ունեն 18-ից բարձր տարիք ունեցող, ինչպես նաև 16 տարին լրացած և AM ենթակարգի տրանսպորտային միջոց վարելու իրավունք ունեցող անձինք։ Անհատական շարժունակության (տեղաշարժման) միջոցներով երթևեկությունը թույլատրվում է հեծանվային կամ հեծանվահետիոտնային արահետներով կամ հեծանվորդների համար նախատեսված գոտիով, դրանց բացակայության դեպքում` նաև օրենքով սահմանված այլ վայրերում: Մինչև 18 տարեկան (բացառությամբ՝ 16 տարին լրացած և AM ենթակարգի տրանսպորտային միջոց վարելու իրավունք ունեցող) անձանց կողմից անհատական շարժունակության (տեղաշարժման) միջոցներով երթևեկության թույլատրելի վայրերը սահմանվում են համայնքի ավագանու կողմից: Անհատական շարժունակության միջոցները վարձակալությամբ տրամադրող կազմակերպությունների համար նախատեսվում է պարտավորություն, որպեսզի բացառեն այդ միջոցները 25 կմ/ժ-ից ավելի արագությամբ վարելը։ Նախատեսված է նաև նվազագույն աշխատավարձի 29-ապատիկի չափով տուգանք, եթե անհատական շարժունակության միջոցը օրենքով սահմանված կարգով կահավորված չէ արագությունը չափող սարքավորումով: Վերջին կարգավորումն ուժի մեջ կմտնի 2025 թ. սեպտեմբերի 1-ից։ Արգելվում է անհատական շարժունակության միջոցով տեղափոխել ուղևոր կամ բեռ (բացառությամբ՝ այդ միջոցն օգտագործողի կողմից առանց ձեռքերի օգտագործման պահվող ուղեբեռի, օրինակ՝ ուսապարկ): Ապրանքների առաքում իրականացնող հեծանվորդների կամ մոպեդների վարորդների կողմից հեծանիվը կամ մոպեդն առանց սաղավարտի կամ չկոճկած սաղավարտով վարելու համար նախատեսվում է տուգանքի նշանակում՝ սահմանված նվազագույն աշխատավարձի յոթնապատիկի չափով: Երթևեկելի մասում ինքնագլորների երթևեկությունը թույլատրվում է մեկ շարքով, արգելվում է վարել թունելներում, թաց ծածկույթ ունեցող ճանապարհներին և այլն։ Անհատական շարժունակության (տեղաշարժման) միջոցների երթևեկությանը ներկայացվող պահանջները խախտելու համար նախատեսվում է տուգանքի նշանակում՝ սահմանված նվազագույն աշխատավարձի հնգապատիկի չափով: Կարգավորումն ուժի մեջ մտնելուց հետո (2024 թվականի նոյեմբերի 24) անհատական շարժունակության (տեղաշարժման) միջոցների երթևեկությանը ներկայացվող պահանջները խախտելու համար Պարեկային ծառայության կողմից կազմվում են արձանագրություններ։

ՔՊ փակ նիստից ArmLur.am-ին հայտնի դարձավ, որ նախաձեռնող խմբի այսօրվա թեժ նիստը ավարտվել է քաշքշուքով։ Իսկ իշխանական հերթական կռվի գլխավոր դերերում ՔՊ խմբակցության պատգամավոր Հայկ Սարգսյանն ու Տավուշի մարզպետ Հայկ Ղալումյանն են եղել: Պատճառը Տավուշում տիրող բնապահպանական խայտառակ վիճակն է եղել, ապօրինի ծառահատումները, ինչի մասին ՔՊ վերջին նիստերին խոսել է Հայկ Սարգսյանը: Այսօր եւս ՔՊ-ական պատգամավորը ծառահատումների մասով սուր ելույթ է ունեցել ու մեղադրել մարզպետ Հայկ Ղալումյանին, ինչն էլ ավարտվել է փոխադարձ վիրավորանքներով ու քաշքշուքով: ArmLur.am-ի տեղեկություններով՝ ՔՊ-ականները իրար հարվածել են հենց Նիկոլ Փաշինյանի ներկայությամբ, վերջինս էլ թողել ու հեռացել է: Վեճին միջամտել է Անահիտ Ավանեսյանը, փորձել է հանգստացնել Հայկ Սարգսյանին ու Ղալումյանին, բայց իրավիճակը գնալով թեժացել է:

Այսօր՝ հունվարի 9-ին, առեղծվածային ու ողբերգական դեպք է տեղի ունեցել Երևանում։ Ժամը 21։20-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Երևանի մետրոպոլիտենի ոստիկանության բաժնում օպերատիվ տեղեկություններ են ստացվել, որ Շենգավիթ մետրոյից դեպի դեպո տանող գծերի հարևանությամբ գտնվող տարածքում, ծառից կախված տղամարդու դի կա, հայտնում է Shamshyan.com-ը։ Ոստիկաններն ու մետրոպոլիտենի ծառայողները նշված հատվածում հայտնաբերել են մոտ 40-45 տարեկան տղամարդու դի։ Դեպքի փաստով Շենգավիթի քննչական բաժնում նախաձեռնվել է քրեական վարույթ։ Ոստիկանությունն ու քննչական բաժինը պարզում են մահացածի ինքնությունը։

Ամերիկայի Միացյալ Նահանգները Գրենլանդիայում իր ռազմական ներկայությունը մեծացնելու պլաններ չունի: «Արմենպրես»-ի փոխանցմամբ՝ ինչպես հայտնում է Reuters–ը՝ այս մասին հայտարարել է Կոպենհագենում ԱՄՆ դեսպանատունը: Այս հայտարարությունը հետևում է ԱՄՆ նորընտիր նախագահ Դոնալդ Թրամփի հայտնած հետաքրքրությանը՝ Գրենլանդիան ԱՄՆ վերահսկողության տակ վերցնելու վերաբերյալ: Թրամփը, որը նախագահի պաշտոնը պաշտոնապես կստանձնի հունվարի 20-ին, այս շաբաթ հայտարարել էր, որ ռազմավարական կարևոր կղզու վերահսկողությունն ԱՄՆ–ից կողմից բացարձակ անհրաժեշտություն է: Նաև չէր բացառել ռազմական կամ տնտեսական գործողությունների կիրառումը, ինչպիսիք են Դանիայի դեմ մաքսատուրքերի կիրառումը: Գրենլանդիան՝ աշխարհի ամենամեծ կղզին, դարեր շարունակ Դանիայի վերահսկողության տակ է: «Չկան պլաններ մեծացնել Միացյալ Նահանգների ներկայիս ռազմական հետքը Գրենլանդիայում»,–ասել են Reuters–ին՝ հավելելով, որ կշարունակեն սերտորեն համագործակցել Կոպենհագենի և Նուուկի (Գրենդլանդիայի մայրաքաղաք) հետ: ԱՄՆ զինվորականները մշտական ​​ներկայություն ունեն Գրենլանդիայի հյուսիս-արևմուտքում գտնվող Պիտուֆիկ ավիաբազայում:

Առնվազն 13 մարդ է զոհվել, ավելի քան 100-ը տուժել Զապորոժիեում: Տեղի իշխանությունը չի հստակեցրել, թե կոնկրետ որտեղ են ընկել ռուսական ռումբերը, սակայն հայտնել է, որ ռմբակոծության է ենթարկվել Զապորոժիեի Շևչենկովսկի շրջանը։

Այսօր՝ հունվարի 9-ին, ՀՀ Ներքին գործերի նախարարության Ոստիկանության քրեական ոստիկանության գլխավոր վարչության ծառայողները Երևան-Սևան ավտոճանապարհի՝ Կոտայքի մարզի վարչական տարածքում հատուկ օպերացիա են իրականացրել։ Ինչպես հայտնում է ֆոտոլրագրող Գագիկ Շամշյանը, այդ օպերացիայի արդյունքում քրեական ոստիկանություն են տեղափոխվել ԱԺ նախկին պատգամավոր, «Հոկտեմբերյանցի Նովո» մականվամբ հայտնի Նահապետ Գևորգյանի որդին և ևս մի քանի հոգի։ Նախաքննության շահերից ելնելով՝ այս պահին որոշ մանրամասներ չենք հրապարակում։

Հայաստանի արտաքին գործերի նախարարությունն իր կարեկցանքն է հայտնել ԱՄՆ Կալիֆոռնիա նահանգում մոլեգնած հրդեհների հետևանքով տուժածներին: Այս մասին նշված է ԱԳՆ-ի X-ի միկրոբլոգում: «Վշտացած ենք ԱՄՆ Կալիֆոռնիա նահանգում մոլեգնող անտառային հրդեհների մասին լուրերից: Մեր կարեկցանքն ու ցավակցությունն ենք հայտնում տուժածներին, նաև ողբերգականորեն կորսված մարդկային կյանքերի համար: Վիրավորներին մաղթում ենք շուտափույթ ապաքինում»,–նշել են ԱԳՆ-ից: Հայաստանի արտաքին քաղաքական գերատեսչությունից հույս են հայտնել, որ հրդեհների հետևանքները և համայնքի կյանքը հնարավոր կլինի արագ կերպով լիովին վերականգնվել: Հիշեցնենք՝ Կալիֆոռնիայում հրդեհներն արդեն հինգ մարդու կյանք են խլել, կան տուժածներ։ Փալիսեյդսի շրջանում հրդեհը տարածվել է ավելի քան 2000 հեկտար տարածության վրա՝ զրոյական մեկուսացմամբ, և ոչնչացրել շուրջ հազար շինություն, ավելի վաղ հայտարարել էին տեղական իշխանությունները: Անտառային հրդեհները հասել են Հոլիվուդի բլուրներ, բռնկվել ամերիկյան ֆիլմարտադրության պատմական կենտրոնի խորքերում: Այրվել են բազմաթիվ տներ, այդ թվում՝ կինոյի աստղերի, հայտնի մարդկանց տներ: Լոս Անջելեսի հրշեջ-փրկարարական վարչությունը մարդկանց տարհանման հրաման է տվել հարավում՝ Հոլիվուդ Բուլվարի, հյուսիսում՝ Մալհոլենդ Դրայվի, արևելքից՝ 101 մայրուղու և արևմուտքում՝ Լորել Կանյոն բուլվարի տարածքում, որտեղ են գտնվում ֆիլմերի, հեռուստատեսության և երաժշտության ոլորտի նշանավոր հասցեներ:

Խառնաշփոթը հանրային տրանսպորտի բարեփոխված համակարգում շարունակում է քայքայել քաղաքացիների նյարդերը: Ամեն օր նոր խնդիրներ են առաջանում երթուղայիններում, տերմինալների մոտ ու քարտերով վճարումների ժամանակ: Անգամ չեն ուզում ուսումնասիրել Երևանի քաղաքապետարանի առաջարկած փաթեթների գրավիչ կողմերը. հին ու մատչելի համակարգն են ուզում:

Ինչպե՞ս են զարգանալու Հայաստան-ԱՄՆ հարաբերությունները: Հայաստանն իրո՞ք ռազմավարական գործընկերության համաձայնագիր է ստորագրելու ԱՄՆ հեռացող վարչակազմի հետ: Արարատ Միրզոյանն էր ասել, որ ՀՀ-ԱՄՆ ռազմավարական գործընկերության համաձայնագիր է ստորագրվելու, թե երբ, չէր բացահայտել: Վաշինգտոնը դեռ պատասխան չունի Հայաստանում ամենաբարձր մակարդակով ձևավորվող սպասումներին:

Հայաստանի Հանրապետության քննչական կոմիտեի նախագահ Արթուր Պողոսյանի նախագահությամբ այսօր տեղի է ունեցել Կոլեգիայի նիստ, որի ընթացքում անձնակազմին են ներկայացվել Քննչական կոմիտեի նախագահի նորանշանակ տեղակալներ Վազգեն Ավետիսյանը և Արթուր Նահապետյանը: Այս մասին տեղեկացնում են ՔԿ-ից: Ներկայացնելով Քննչական կոմիտեի նախագահի նորանշանակ տեղակալներին՝ Արթուր Պողոսյանն ընդգծել է, որ Վազգեն Ավետիսյանը և Արթուր Նահապետյանն ունեն աշխատանքային հարուստ փորձ, վերջիններս իրենց աշխատանքային գործունեությունը սկսել են քննիչի աշխատանքից, զբաղեցրել են նաև ղեկավար պաշտոններ, ունեն մասնագիտական և մարդկային բարձր հատկանիշներ, մշտապես աչքի են ընկել պրոֆեսիոնալիզմով, կատարողական բարձր ցուցանիշներ են արձանագրել և այսօր պատրաստ են իրենց գիտելիքներն ու փորձը ծառայեցնելու Քննչական կոմիտեի առջև ծառացած խնդիրների արդյունավետ լուծմանը, և հույս է հայտնել, որ արդյունքները տեսանելի ապագայում երկար սպասեցնել չեն տա: Անդրադառնալով Քննչական կոմիտեի նախագահի նախկին տեղակալ Արթուր Մելիքյանին՝ Արթուր Պողոսյանը շնորհակալություն է հայտնել կատարած աշխատանքի համար և հաջողություններ մաղթել վերջինիս: Քննչական կոմիտեի նախագահի տեղակալներ Վազգեն Ավետիսյանը և Արթուր Նահապետյանը շնորհակալություն են հայտնել Հայաստանի Հանրապետության վարչապետին այդ պատասխանատու պաշտոնն իրենց վստահելու համար և հավաստիացրել են, որ գործադրելու են առավելագույն ջանքեր պատշաճ և համակողմանի նախաքննության իրականացումն ապահովելու, հասարակության շրջանում Քննչական կոմիտեի հեղինակությունը բարձրացնելու, հանրության սպասելիքներն արդարացնելու համար: Խորհրդակցության վերջում Քննչական կոմիտեի նախագահը Արթուր Մելիքյանին պարգևատրել է հուշանվեր ժամացույցով:

Այսօր՝ հունվարի 8-ին, վրաերթ է տեղի ունեցել Երևանում։ Ժամը 21։30-ի սահմաններում Սաֆարյան փողոցում՝ թիվ 77 հասցեի դիմաց, Երևանի բնակիչ 37-ամյա Դավիթ Նավոյանը իր վարած «Toyota Camry» մակնիշի ավտոմեքենայով վրաերթի է ենթարկել կին հետիոտնի։ Ինչպես հայտնում է ֆոտոլրագրող Գագիկ Շամշյանը, վարորդը փախուստի չի դիմել, օգնել է վրաերթի ենթարկվածին օպերատիվորեն ժամանած շտապօգնություն ավտոմեքենայով տեղափոխվել «Սուրբ Գրիգոր Լուսավորիչ» բժշկական կենտրոն։ Դեպքի փաստով ճանապարհատրանսպորտային հանցագործությունների քննության բաժնում փաստաթղթեր են ձևակերպվում, որտեղ էլ պարզվում են վրաերթի ենթարկվածի ինքնությունը։

Թուրքիան զգուշացնում է Սիրիայի հյուսիսում հնարավոր հարձակման մասին: Ըստ կառավարամետ Türkiye թերթի՝ հնարավոր հարձակմանը կարող են մասնակցել նաև Անկարայի հետ համագործակցող սիրիական խմբավորումները։ Էրդողանը, ի դեպ, օրերս է հայտարարել, որ քուրդ զինյալները «կա՛մ հրաժեշտ կտան իրենց զենքին, կա՛մ իրենց զենքերի հետ կթաղվեն սիրիական հողում»:

Ալիևի վերջին սպառնալիքներին «երկխոսության լեզվով» արձագանքելուց մեկ օր անց Նիկոլ Փաշինյանը 6 կետանոց առաջարկով է հանդես եկել Ֆեյսբուքում՝ փաստացի ընդունելով ԵԱՀԿ Մինսկի խումբը լուծարելու Ալիևի պահանջը: Մոտ երեք տարի Ադրբեջանի հետ խաղաղության պայմանագրի շուրջ բանակցելուց հետո Հայաստանի վարչապետը հայտարարում է՝ Բաքուն փորձում է տարածաշրջանում էսկալացիայի «լեգիտիմություն» ձևավորել, սակայն Երևանը չի գնալու այդ ճանապարհով:

2011-ին ն Ռուսաստանի այն ժամանակվա նախագահ Դմիտրի Մեդվեդևը Կազանում առաջարկել էր ԼՂ հակամարտության լուծման վերաբերյալ փաստաթուղթ, որը բանակցվել էր շուրջ երեք տարի։ Դրանով նախատեսվում էր 5+2 ձևաչափով շրջանների հանձնում Ադրբեջանին։

Կալիֆոռնիայում hունվարի 7-ից բռնկված հրդեհների հետևանքով զոհվածների թվում, այս պահին ունեցած տեղեկություններով, ՀՀ քաղաքացիներ չկան: Այդ մասին «Լուրերին» տեղեկացրել է ԱԳՆ մամուլի խոսնակ Անի Բադալյանը: «Լոս Անջելեսում ՀՀ գլխավոր հյուպատոսությունն աշխատում է բնականոն ռեժիմով, իրականացվում է հյուպատոսական ընդունելություն: Հունվարի 8-ին ստացվել է մոտ երեք տասնյակ հեռախոսազանգ՝ հյուպատոսական հարցումներով։ Գլխավոր հյուպատոսությունը մշտական կապի մեջ է տեղական իշխանությունների, մասնավորապես՝ Լոս Անջելեսի և Գլենդելի քաղաքապետարանների, ինչպես նաև համայնքային կառույցների հետ»,- նշել է ՀՀ ԱԳՆ մամուլի խոսնակը: Լոս Անջելեսում մոլեգնող անտառային հրդեհների ֆոնին ԱՄՆ նախագահ Ջո Բայդենը Կալիֆոռնիայում աղետի ռեժիմ է հայտարարել և չեղարկել Իտալիա այցը: Նախագահը մեկնել է Կալիֆոռնիա, նաև կարգադրել գումար հատկացնել՝ աջակցելու տեղական իշխանությանը: Հրդեհի հետևանքով տասնյակ հազարավոր մարդիկ տարհանվել են, հայտնի է առնվազն 5 զոհի մասին, կան տուժածներ: Հազարավոր տներ և ձեռնարկություններ են այրվել: Հայաշատ քաղաքները նույնպես կրակի գոտում են:

Հայլուր 20։30 Ալիևի հերթական պահանջը կատարեց Փաշինյանը. 6 առաջարկ՝ Բաքվին

Կալիֆորնիայում մոլեգնող անտառային ավերիչ հրդեհների հետևանքով առնվազն հինգ մարդ է զոհվել: Մահաբեր կրակը հազարավոր տներ է կուլ տվել Լոս Անջելեսի շրջանում՝ տարածվելով մոտ 11.000 հեկտար տարածքի վրա: Հրդեհաշիջման աշխատանքները դժվարանում են՝ ուժեղ քամիների ու ցածր խոնավության պատճառով: Նահանգում աղետի ռեժիմ է հայտարարվել: