Հյուսիս-Հարավ նոր մայրուղու վրա բախվել են 2 BMW-ներն ու 06-ը․ կան վիրավորներ

Երեկ՝ դեկտեմբերի 16-ին, խոշոր ավտովթար է տեղի ունեցել Երևանում։ Ժամը 23։30-ի սահմաններում Սիլիկյան թաղամասից դեպի Հյուսիս-Հարավ նոր մայրուղու միջնամասում բախվել են Արմավիրի մարզի բնակիչ 57-ամյա Արամ Հ․-ի վարած VAZ 2106 մակնիշի, Երևանի բնակիչներ 35-ամյա Սարգիս Ի.-ի վարած BMW մակնիշի և 24-ամյա Արտավազդ Ե.-ի վարած BMW մակնիշի ավտոմեքենաները։ 

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով Սարգիս Ի․-ն և նրա ուղևոր՝ Երևանի բնակիչ 29-ամյա Գաբրիել Բ․-ն մարմնական վնասվածքներով տեղափոխվել են «Աստղիկ» բժշկական կենտրոն։ 

Վիրավորներին շտապօգնության ավտոմեքենաներին են մոտեցրել հրշեջ-փրկարարները, այնուհետև հոսանքազրկել են ավտոմեքենաները, դադարեցրել 2 ավտոմեքենայի գազի արտահոսքը։ 

Ֆոտոլրագրողը հայտնում է, որ երբ BMW-ներից մեկը բախվել է 06-ին, վերջինս դուրս է եկել երթևեկելի գոտուց, բախվել նոր կառուցվող թաղամասի անվտանգության համար տեղադրված թիթեղյա պարսպին, կոտրել այն և հայտնվել շինհրապարակի տարածքում, բախվելով քարերին։ 

Քննիչի հանձնարարականով՝ ավտոմեքենաները տեղափոխվել են Պարեկային ծառայության Երևանի գնդի պահպանվող հատուկ տարածք։