Լրահոս

Շաբաթն էլ չի անցնում՝ առանց նոր աղմուկի մեր կրթության ու գիտության նախարարության շուրջ: Այս անգամ Կրթության ազգային ինստիտուտի աշխատակիցներն են բողոքում սուպերնախարարությունից: Իրենք անգործ են մնացել, որովհետև իստիտուտը լուծարվել է:

Խորհրդարանական ընդդիմությունը կարող է բողոքարկել հանրաքվե անելու որոշումը Սահմանադրական դատարանում: Ըստ էության դրա համար բավարար է պատգամավորների 1/5-ի նվազագույնը 26 պատգամավորի ստորագրությունը: Խոհրդարանի 132 պատգամավորից 26-ը՝ ,Բարգավաճ Հայաստան խմբակցությունից, իսկ 17-ը՝ ,Լուսավոր Հայաստանից: «Լուսավոր Հայաստանն» ի դեպ պատրաստ է դիմել բարձր դատարան, հապաղում է Բարգավաճ Հայաստանը:

Ադրբեջանում կիրակի պատմության մեջ առաջին արտահերթ խորհրդարանական ընտրություններն էին: Հարևան երկրից մեզ հասած կադրերը ուղղակի ապշեցնող են բախումներ, լցոնումներ, անգամ մահվան դեպքեր ու այս ամենը ինչ-որ հրաշքով վրիպել է մի շարք երկրների դիտորդների աչքերից: Ամենահետաքրքիրն այն է, որ միլի մեջլիսում նորից մեծամասնություն է կազմել Ալիևի նոր Ադրբեջան կուսակցությունը, պարզապես կազմն է մի քիչ երիտասարդացել:

Մեր հաջորդ պատմությունը մի փոքրիկի մասին է, որ ծնվել էր մոտ 1.5 կիլոգրամանոց գոյացությունով, բայց աննախադեպ վիրահատությունը ազատել է երեխային իր կեսի չափ կշռող խնդրից:

Հանրաքվեի քարոզարշավի մեկնարկի պաշտոնական օրն էլ դեռ հայտնի չէ, բայց այո-ի շտաբի քարոզչամեքենան գործի է դրվել ամենաբարձր՝ վարչապետի մակարդակով: Անթաքույց ուրախություն, որ Փաշինյանը չկարողացավ զսպել անգամ մինչև դասական համերգի ավարտը: Նա հենց Արամ Խաչատրյան համերգասրահից ֆեյսբուքյան ուղիղ եթեր մտավ կոչ անելով, որ Հայաստանի՝ արտասահմանում ապրող քաղաքացիները մինչև ապրիլի 5-ը գան Հայաստան ու մասնակցեն հանրաքվեին:

Այսօր Մալաթիա-Սեբաստիա վարչական շրջանի բնակիչների ու իրավապահների մեջ բախում է եղել, երբ շինարարական տեխնիկան մոտեցել ու սկսել է քանդել տեղի ավտոտնակները, որոնք ըստ էության Հյուսիս-Հարավ ճանապարհի կառուցմանն են խանգարում: Մալաթիա-Սեբաստիայի բնակիչները քաղաքապետարանից պահանջում են վերանայել նախագիծը, որով արագընթաց ճանապարհն անցնելու է բնակելի շենքից ընդամենը 6 մետր հեռավորության վրա:

Տեխնոկրատ Հայաստանի ամենաարժեքավոր ծնունդներից մեկը՝ Ռոբին ռոբոտը, արդեն 2 ամիս է երեւանյան մի հիվանդանոցում բժիշկների հոգսն է կիսում: Երեխաների բարձր տրամադրությունն է ապահովում, որ ռենտգեն հետազոտությունն ու ներարկիչները չվախեցնեն փոքրիկներին: Ռոբինը միակն է աշխարհում, որը տարբերում է մարդու հույզերը: Չնայած տարիքին կարող է ինչուիկների ցանկացած հարցի պատասխանել:

Շաբաթվա վերջին զինվորների մահվան գույժ եկավ Սյունիքից: 4 զինծառայող, հայտնվել էին ձնաբքի մեջ: 3-ին որոնողական խումբը մահացած գտավ՝ շարքային 29 տարեկան Կարապետ Սեդրակի Նազարյան, կրտսեր սերժանտ 25-ամյա Տիգրան Արմենի Արզումանյան, կրտսեր սերժանտ 24-ամյա Նվեր Տիգրանի Շահբազյան: Ձնաբքից փրկված պայմանագրային զինծառայող Համլետ Գրենիկի Միրզոյանի վիճակը գնահատվում է բավարար: Անցած երկու շաբաթում սա բանակում խաղաղ պայմաններում զինվորի մահվան 5-րդ դեպքն էր:

ՍԴ 24-ամյակի օրը բարձր դատարանի շենքից մի քանի մետր այն կողմ խորհրդարանի շենքում տեղի ունեցավ քաղաքական տարվա ամենաաղմկոտ իրադարձությունը: Օրենսդիրը շատ իրավաբանների պնդմամբ՝ սահմանադրությունը խախտելով, որոշեց սահմանադրական դատարանի մինչեւ 2018 թվականի ապրիլի 9-ը նշանակված դատավորներին տուն ուղարկելու համար հանրաքվե անցկացնել: Ճիշտ է իրավաբանների կողմից սահմանադրական կարգը տապալելու փորձ որակված այդ ակցիային չմիացավ խորհրդարանի ընդդիմադիր թևը Լուսավոր Հայաստանը դեմ քվեարկեց, ԲՀԿ-ն չմասնակցեց քվեարկությանը: Իսկ այ իմքայլականները ցույց տվեցին պարլամենտարիզմի մաստեր-կլաս: Վարչապետն այդպես անվանեց 88 հոգանոց խմբակցության միաձայն այո-ն՝ հանրաքվե անցկացնելու սկանդալային որոշման տակ:

Երեխաներին ծնողներից խլելու, ապօրինի որդեգրման հանձնելու մասին սահմռկեցուցիչ պատմություններին Հայլուրը բազմիցս անդրադարձել է: Երբ այս դեպքերով քրեական գործ հարուցվեց եւ մեղադրանք առաջադրվեց երկրի հանրապետական հիվանդանոցի գլխավոր տնօրենին, նրա տեղակալին ու մի մանկատան տնօրենի, հանրապետականում ծննդաբերած բազմաթիվ կանայք իրավապահներին, լրատվամիջոցներին երեխաներ կորցնելու իրենց դժբախտ պատմությունը պատմեցին:

«Սկսվել է ԻՐԱԿԱՆՈՒՄ ազատ, արդար, ժողովրդավար և ինքնիշխան պետության կայացման գործընթացը»: Սրանք տողեր են 9-րդցիների պատմության դասագրքի նոր էջերից: 2018 թվականի ապրիլյան իրադարձությունների մասին են: Պատմությունը շատ քիչ ու բնավ էլ ոչ ժողվրդվարական երկրների օրինակներ է հիշում, որ իշխանությունը դեռ չփոխված քաղաքական գնահատական տա նորօրյա դեպքերին:

Աշխարհը սարսափի մեջ պահող կորոնովիրուսի պատճառով սպառվել են բժշկական դիմակների համաշխարհային պաշարները: Այդ մասին հայտարարել է առողջապահության համաշխարհային կազմակերպության ղեկավարը: Համաճարակի ֆոնին դիմակների պահանջարկն ավելացել է հարյուր անգամ, ինչի հետևանքով դրանց գինը քսան անգամ բարձրացել է: Իսկ վիրուսը չի նահանջում: Աշխարհում զոհերի թիվը հասել է 724-ի: Վարակակիրները՝ մոտ 35.000-ն են:

Արցախի սահմանի ուղղությամբ այս շաբաթ հակառակորդն արձակել է ավելի քան 1200 կրակոց: Հրադադարը խախտել է 190 անգամ: Ըստ պաշտոնական հաղորդագրության մերոնք հիմնականում ձեռնպահ են մնացել պատասխան գործողություններից, վստահ իրականացրել մարտական խնդիրը: Ինչպե՞ս են մեր գործերը դիվանագիտական ճակատում: Հայաստանի ու Ադրբեջանի արտգործ նախարարների վերջին հանդիպման մասին սկանդալային տեղեկություններ հրապարակեց Արցախի նախագահի թեկնածու Վիտալի Բալասանյանը: Հայաստանի արտգործ նախարարությանը խոսնակը սին և իրականության հետ որևէ աղերս չունեցող ենթադրություններ անվանեց Արցախի հերոսի հայտարարությունները: Քաղաքագետները կարծում են, որ քաղաքացիները պետք է Արտգործ նախարարությունից պահանջեն գաղտանզերծել, թե կոնկրետ ի՞նչ են քննարկել Մանցականյանն ու Մամեդյարովը 11 ժամ փակ դռների հետևում: 

Հայաստանը լավատես պետությունների հնգյակում է: Երջանիկ պետությունների տասնյակում: 46 երկրում անցկացված հարցումների արդյուքները այսօր հրապարակվել են Երևանում: Մենք լավատեսությամբ առաջ ենք Իտալիայից: Երջանկության մեր ինդեքսը ցածր է անգամ Նիգերիայից:  

Հանրապետության նախագահի աշխատակազմը ստացել է Հանրաքվե անցկացնելու մասին խորհրդարանի ընդունած օրինագիծը: Այն Բաղրամյան 26 է ուղարկել Ազգային ժողովի նախագահ Արարատ Միրզոյանը։ Արմեն Սարգսյանը մինչև փաստաթուղթը ստանալը, արդեն ըստ էության, հայտարարել է, որ ինքը դեմ չէ հանրաքվեին, որը նպատակ ունի տուն ուղարկելու Սահմանադրական դատարանի այն դատավորներին, որոնք նշանակվել են մինչև 2018-ի ապրիլի 9-ը: