Իսպանիայի ոստիկանությունը սեռական ստրկությունից ազատել է հինգ կնոջ

Իսպանական ոստիկանությունը ազատ է արձակել հինգ կանանց, որոնք սեռական շահագործման էին ենթարկվել մարդկանց թրաֆիքինգի և թմրանյութերի ապօրինի շրջանառության մեջ ներգրավված հանցավոր ցանցի կողմից, «ՌԻԱ Նովոստի»-ի փոխանցմամբ՝ ասվում է թագավորության իրավապահ մարմինների մամուլի հաղորդագրության մեջ։

«Իսպանիայի ազգային ոստիկանությունը ազատ է արձակել հինգ կանանց, որոնք սեռական շահագործման էին ենթարկվել միջազգային հանցավոր կազմակերպության կողմից, որը կասկածվում էր մարդկանց թրաֆիքինգի մեջ՝ սեռական շահագործման նպատակով, ինչպես նաև հանրային առողջության դեմ ուղղված հանցագործությունների մեջ՝ թմրանյութերի ապօրինի շրջանառության և դեղագործական արտադրանքի տարածման տեսքով Տոլեդո և Մադրիդ նահանգներում», - ասվում է հայտարարության մեջ։

Գործակալության տվյալներով՝ գործողության արդյունքում ձերբակալվել է ութ անձ։

Ոստիկանությունը չորս խուզարկություն է անցկացրել, այդ թվում՝ մեկը թմրավաճառության որջում, որը հետագայում փակվել է, և առգրավվել է երկու կիլոգրամ կոկաին։

Ըստ տեղեկությունների՝ հանցավոր խումբը կազմված էր Լատինական Ամերիկայի և Իսպանիայի քաղաքացիներից։ Կոլումբիայից և Վենեսուելայից կանանց խաբել են աշխատանքի կեղծ խոստումներով, տեղափոխել Իսպանիա, զրկել նրանց փաստաթղթերից, ապա ստիպել են սեռական ծառայություններ մատուցել։

Կանանց շահագործելուց բացի, ցանցը զբաղվել է նաև թմրանյութերի ապօրինի շրջանառությամբ։ Օրինակ՝ հաճախորդներին կոկաին են առաջարկել այն տարածքում, որտեղ պահվել են զոհերը։ Խուզարկությունների ընթացքում ոստիկանությունը հայտնաբերել է թմրանյութի մշակման և փաթեթավորման լաբորատորիա։