Լրահոս

Մարտի 1-ի գործով դատաքննությունը մոտ մեկ ամսով ընդհատվեց: Դատավոր Աննա Դանիբեկյանն այսօրվա դատական նիստում հայտարարեց, որ դեկտեմբերի 10-ից 30-ը գտնվելու է արձակուրդում։ Թեև Ռոբերտ Քոչարյանի ու մյուսների գործով դատը սկսվել է գարնանը, ու բուն գործի քննությանը դեռ չի հասել, դատավորը հրաժարվեց մինչև արձակուրդ մեկնելը ևս մեկ նիստ նշանակել: Պատճառաբանությունն այն էր, թե դատական նիստերի դահլիճը ծանրաբեռնված է: Իսկ Քոչարյանի պաշտպանական թիմը այդ նիստի անհրաժեշտությունն էր զգում մարդիկ կան, ովքեր ցանկանում են անձնական երաշխավորություն ներկայացնել Քոչարյանի խափանման միջոցը փոխելու համար:

Բողոքի ցույցերի մեջ խճճված մեր աշխարհի համար ի՞նչ կանխատեսում ունեն աստղաբանները: 2020-ին ընդառաջ հուսադրող մտքեր երևի հենց միայն նրանք են տալիս:

Նախարարների աշխատավարձերը՝ պարգեւավճարների տեսքով գաղտնի բարձրացնելու սկանդալից հետո հիմա էլ Ազգային ժողովի պատգամավորներն են աստղաբաշխական պարգեւավճարներ ստանում: Խոսքը մոտ 2 միլիոն դոլորի մասին է, որ բաժանվել է տասը ամսում:

Մարտի մեկի գործից մինչև քաղաքապետարանի նվիրատվությունների սկանդալ ու մարզպետների պարգևատրումներ: Այսօր լրագրողները Արարատի մարզում փորձել են հարցեր ուղղել վարչապետ Փաշինյանին, ակայն նա սահուն շրջանցել է դրանք, խոսել միայն փոքրիկ Սամվելիկի իրականացած երազանքի ու փռված ասֆալտի որակի մասին:

Ակտիվիստ Շահեն Հարությունյանը ոստիկանությունում բացատրություն է տվել, թե ինչու է գիշերը կարմիր ներկ լցրել ռուս դրամատուրգ Ալեքսանդր Գրիբայեդովի արձանի վրա: Վանդալիզմի փաստը ապացուցող լուսանկարը հենց ակտիվիստն է տեղադրել ֆեյսբուքյան էջում, նշել, թե այդ կերպ պատասխանում է Ռուսաստանում Գարեգին Նժդեհի հուշատախտակը ներկելու դեպքին: Հարությունյանի արածը դատապարտել են շատ շատերը վարչապետի մամուլի խոսնակից մինչև Հայաստանում Ռուսաստանի դեսպանատուն:

Հայաստանի ու Ադրբեջանի արտաքին գործերի նախարարների վաղվա հանդիպմանն ընդառաջ ԵԱՀԿ մինսկի խմբի համանախագահ Ռուսաստանի դիվանագիտության ղեկավարը Բաքվում է եղել: Սերգեյ Լավրովի հայտարարություններում հայ փորձագետները գտել են՝ նախկինում չհրապարակված տողեր:

Խորհրդարանի Իմ քայլը խմբակցությունը դեռ չի քննարկել՝ միանալու՞ են Երևանի քաղաքապետարանին կամազների սկանդալային նվիրատվության հարցով քննիչ հանձնաժողով կազմելու՝ Լուսավոր Հայաստանցիների նախաձեռնությանը, թե ոչ: Ամեն դեպքում Ազգային ժողովի իմ քայլական փոխխոսնակ Ալեն Սիմոնյանը վստահ է, որ ընդդիմությունը կամազների մասին աղմկում է՝ օրենքի բացերը շահարկելով: Իսկ քաղաքապետարանը արդեն հայտարարել է, որ առաջիկայում նվիրատվություններ արած ընկերությունների 10 նոր անուն կներկայացնի:

Ամանորին երազանքները կատարվում են: Մրգավետ գյուղի վագոն-տնակներից մեկում ապրող Մհերյանների համար հաստատ այդպես է: Նրանք մեծ նորամուտի են պատրաստվում:

Խորհրդարանական մեծամասնությունը փոշմանել է: Ազգային անվտանգության ծառայության տնօրենի, ոստիկանության պետի պաշտոնները քաղաքական դարձնելու Լուսավոր Հայաստանի առաջարկը մոտ է վերջնական մերժում ստանալուն:

Ոստիկանության Կենտրոնի բաժին է  բերման ենթարկվել մի քանի ցուցարար․ հայտնի են 3-ի անունները՝ Գերասիմ Վարդանյան, Արգիշտի Գևորգյան, Դավիթ Հունանյան։

Երկուշաբթի օրով դասի փոխարեն կառավարության դիմաց էին այսօր եկել Դիլիջանի և Բյուրեղավանի գիշերօթիկ դպրոցների սաները, նրանց ծնողները: Անելանելի վիճակում են: Ծնողների խոսքով՝ երեխաներին գիշերօթիկից տուն ուղարկած կառավարությունը նախապես չի հոգացել, թե ինչպես պետք է ապրեն երեխաները, որտե՞ղ դպրոց գնան:

Արցախում մեկ զինվոր զոհվել է, ևս մեկը վիրավորվել: Դեպքը տեղի է ունեցել այսօր վաղ առավոտյան, Պաշտպանության բանակի հյուսիս-արևելյան զորամասերից մեկում: Ըստ պաշտոնական հաղորդագրության, 21-ամյա զինծառայող Արթուր Իշխանի Աջամյանը ստացել է մահացու հրազենային վիրավորում: Իսկ 20 ամյա զինծառայող Դավիթ Հարությունի Մելիքբեկյանը վիրավորվել է: Հարուցվել է քրեական գործ: Հանգմանաքները պարզ չեն: Հայտնի չէ՝ արդյո՞ք հակառակորդի գնդակից է զոհվել 21-ամյա տղան: Հայտնի է, որ Մնացականյան-Մամեդյարով հանդիպմանն ընդառաջ ու Ադրբեջանի ներքաղաքական լարվածության ֆոնին Բաքուն սրում է առաջնագծի վիճակը: Անցած շաբաթվա վերջին հակառակորդի կրակոցից ծանր վիրավորվել է Ռաֆայել Ազիզյանը: Փորձագետները մտահոգություն ունեն, որ Ադրբեջանը իշխանությունը Ալիևից Ալիևային փոխանցելու ընթացքում հավատարիմ կմնա հին գործելաոճին: Կփորձի շփման գծի լարվածությունը օգտագործել՝ սեփական ժողովդրի ուշադրությունը շեղելու համար: