Լրահոս

Երևանի քաղաքապետարանի 2020-ի բյուջեի նախագիծը զայրացրել է ավագանու ընդդիմադիր անդամներին Նրանք պնդում են, որ նախագծում շատ են բացթողումները, մոնիթորինգ չկա: Հաջորդ տարի բյուջեի ծախսը կազմելու 116 մլրդ. դրամ, բայց թե կոնկրետ ինչ ծախսեր են լինելու՝ պարզ չէ: Քաղաքային իշխանությունը նաեւ 355 մլն. դրամի հրատապ ծախսեր է պլանավորել: Սա ամենաշատն է բարկացրել ավագանուն՝ 2018-ի համար այդ գումարը 30 մլն. է կազմել:

ԱԱԾ նախկին տնօրեն Արթուր Վանեցյանը, որ պաշտոնից հեռանալիս իշխանությանը կանգ առնելու կոչ էր արել, նոր անհանգստություն է առաջացրել հանրության շրջանում անպատասխան թողնելով «Պրեսսինգ» հաղորդաշարի ժամանակ հնչած մի շարք քաղաքական հարցեր: Մի քանի վայրկյան մտածելուց հետո չի պատասխանել անգամ հարցին, թե արդյո՞ք Հայաստանն ու Արցախի հարցը վտանգված են: Իսկ հարցին, արդյոք ծառայության տնօրեն եղած ժամանակ վարչապետից ստացել է հանձնարարական որը տարակուսելու տեղիք կտար, Վանեցյանը պատասխանել է՝ «Տարակուսելու շատ առիթներ եմ ունեցել»:

Համացանցում հայտնված ոստիկանների կողմից քաղաքացու խոշտանգման տեսագրությունը դատախազությունն ուղարկել է Հատուկ քննչական ծառայություն: Կադրերում, որի տարեթիվն ու ամսաթիվը հայտնի չէ համացանցում հայտնվել է նոյեմբերի 21-ին: Տեսագրությունում երեւում է, թե ինչպես են ոստիկանները մահակով ու հակագազով ցուցմունք կորզում քաղաքացուց:

Իրանում ինտերնետը մասամբ վերականգնվել է, ցուցարարներն էլ արդեն նահանջել են: Իրանագետ Վարդան Ոսկանյանը նկատում է, որ Իրանը կարողացավ ինքնակարգավորվել: Թեպետ, այդպես էլ հստակ չէ, թե 7 օր տեւած ակցիաների հետեւանքով քանի զոհ կա: 

Լեոնիդ Ազգալդյանն այս՝ տարի մի խումբ ակտիվիստների շնորհիվ դարձավ Արցախի հերոս: Որոշումը անակնկալ էր Ազգալդյանին հերոսի կոչում տալու նախաձեռնության հեղինակների համար: Նրանք դիմել էին՝ հրամանատարին Հայաստանի հերոսի կոչում տալու համար: Այսօր Ազգալդյանի ծննդյան 77-ամյակն է: Հերոսի ընկերներն ու հարազատները ծաղիկներ են դրել նրա կիսանդրու մոտ:

Նոյեմբերի 15-ին տեղի ունեցավ «Վերնատուն» հասարակական–քաղաքական ակումբի համաժողովը: Ակումբի անդամներից բացի, հրավիրված էին արտախորհրդարանական քաղաքական ուժերի, փորձագիտական շրջանակների, քաղաքացիական հասարակության բազմաթիվ ներկայացուցիչներ։

Այժմ մանրամասներ մայրաքաղաքի կենտրոնը իրար խառնած հերդեհից: Աբովյան-Պուշկին խաչմերուկում կեսօրից հետո հրդեհվել է Դոլմամա ռեստորանի շենքի տանիքը: Դեպքի վայր է հասել հրշեջների 10 մարտական հաշվարկ: Այրվել են տանիքի փայտյա կառուցատարրերը: Այստեղ է եկել նաև արտակարգ իրավիճակների նախարար Ֆելիքս Ցոլակյանը: Դեպքի մանրամասները պարզում են: Շենքի հարևանությամբ ապրող բնակիչները մտավախություն ունեն, որ հրդեհը դիտավորություն է, որպեսզի իրենց հանեն տներից ու Երևանի կենտրոնում հերթական էլիտար շենքը բարձրանա:

Հայաստանի ֆուտբոլի հավաքականի 9-1 հաշվով խայտառակ պարտությունից հետո Ֆուտբոլի ֆեդերացիայի նախագահի պաշտոնը այսօր թողել է Արթուր Վանեցյանը: Երբ նա հրաժարական ներկայացրեց ԱԱԾ տնօրենի պաշտոնից, Նիկոլ Փաշինյանը հայտարարեց, թե Վանեցյանը կկենտրոնանա մեր հավաքականին Եվրոպայի առաջնության եզրափակիչ դուրս բերելու «շատ կարևոր, պետական նշանակության խնդրի լուծման վրա»:

Ոստիկանների դեմ ոստիկանություն հաղորդում է տարել Սոնա Աղեկյանը: Նա պնդում է, որ ոստիկանները իրեն քաշքշել են կրթության նախարարի հրաժարականը պահանջող երիտասարդների ակցիայի միանալու համար:

Հայաստանի նախկին բոլոր ղեկավարներն են մեղավոր,իրեն Քրիստոսի հետ համեմատած վարչապետ Փաշինյանի կարծիքն է: Նաև իր քաղաքական կնքահորը Փաշինյանը չարիք է համարում, քանի որ, ըստ իրեն, Տեր-Պետրոսյանը 96-ին նախագահ է ընտվել՝ չունենալով ժողովրդի վստահության քվեն:

Կառավարությունը այսօրվա նիստում որոշել է 7 մլրդ. 526 մլն. դրամ գնահատված Ծաղկաձորի Գոլդեն փելես հյուրանոցը աճուրդի հանել: Ինչպես հիշում եք այս հյուրանոցը պատկանում էր մաքսային ծառայության նախկին պետ Արմեն Ավետիսյանի ընտանիքին: Իշխանափոխությունից հետո՝ այն որպես նվիրատվություն Ավետիսյանները փոխանցել են պետությանը: Աճուրդը կմեկնարկի դեկտեմբերի 18-ին: Մինչև հյուրանոցը նոր տեր կունենա՝ դրա պահպանման համար պետությունը ամսական 6 միլիոն դրամ կծախսի: Ոստիկանությունում խոշտանգումների դեպքերը բացառելու, դատավորներին կարգի հրավիրելու նոր գործիքներ է առաջարկում գործադիրը: Այդ օրանգծերին այսօր հավանություն են տվել ու ուղարկել են խորհրդարան:

Խոսրովի անտառ-արգելոցում աննախադեպ մի բան է տեղի ունեցել: Որսագողերից բացի, այստեղ ապօրինի մտել են նաև գանձագողերը: Գերեզմաններ են քանդել, շիրմաքարերի տակ ոսկի փնտրել: Չեն գտել, քանի որ չկա,վստահեցնում են տարածքը հսկող տեսչները: Հուսահատ գողերը դատարկ ձեռքով անտառից դուրս չգալու համար, թռցրել են տարածքը հսկող տեսախցիկները:

Երևանում բացվել է միկրոքանդակագործ Էդուարդ Տեր-Ղազարյան կրտսերի ցուցահանդեսը: Աշխարհում առաջինն էր նրա պապը՝ Էդուարդ Տեր-Ղազարյանը, որին հաջողվեց Չապլինին, Պագանինիին, ԱՄՆ-ի Ազատության արձանը, Աբու Լալա-Մահարիի ուղտերի քարավանը տեղավորել ասեղի անցքի մեջ:

Պոպուլիստ իշխանություն լինելու Սարգսյանի մեղադրանքը չի ընդունում Իմ քայլի պատգամավոր Տիգրան Ուլիխանյանը, որը վերջերս սկանդալի մեջ հայտնվեց, երբ հայտարարեց, թե իրենց քաղաքական թիմի դեմ խաղ չկա: